ದಾವಣಗೆರೆ ದಕ್ಷಿಣದಲ್ಲಿ ಕೈ ನಾಯಕರಿಗೆ ಬಂಡಾಯದ ಬಿಸಿ: ‘ರಣರಂಗದಿಂದ ಹಿಂದೆ ಸರಿಯಲ್ಲ’ ಎಂದ ಸಾಧೀಕ್ ಪೈಲ್ವಾನ್!

ದಾವಣಗೆರೆ: ಜಿಲ್ಲೆಯ ದಕ್ಷಿಣ ವಿಧಾನಸಭಾ ಕ್ಷೇತ್ರದಲ್ಲಿ ರಾಜಕೀಯ ಹಗ್ಗಜಗ್ಗಾಟ ತೀವ್ರಗೊಂಡಿದೆ. ಕಾಂಗ್ರೆಸ್ ಹಿರಿಯ ನಾಯಕರ ಸಂಧಾನ ಪ್ರಯತ್ನಗಳ ನಡುವೆಯೂ ಬಂಡಾಯದ ಬಾವುಟ ಹಾರಿಸಿರುವ ಸಾಧೀಕ್ ಪೈಲ್ವಾನ್, “ಯಾವುದೇ ಕಾರಣಕ್ಕೂ ನಾನು ಚುನಾವಣಾ ರಣರಂಗದಿಂದ ಹಿಂದೆ ಸರಿಯುವುದಿಲ್ಲ” ಎಂದು ಸ್ಪಷ್ಟಪಡಿಸಿದ್ದಾರೆ.

ಸಮಾಜದ ಸೋಲು ನನ್ನ ಸೋಲು:

ಮಾಧ್ಯಮಗಳೊಂದಿಗೆ ಮಾತನಾಡಿದ ಸಾಧೀಕ್ ಪೈಲ್ವಾನ್, ತಾವು ಕಣಕ್ಕಿಳಿಯುತ್ತಿರುವುದು ಕೇವಲ ವೈಯಕ್ತಿಕ ಹಿತಾಸಕ್ತಿಗಾಗಿ ಅಲ್ಲ, ಬದಲಿಗೆ ತಮ್ಮನ್ನು ನಂಬಿದ ಸಮಾಜಕ್ಕಾಗಿ ಎಂದು ಭಾವುಕರಾಗಿ ನುಡಿದರು. “ನಾನು ರಣರಂಗದಿಂದ ಹಿಂದೆ ಸರಿದರೆ ಅದು ಇಡೀ ಸಮಾಜಕ್ಕೆ ಮಾಡಿದ ಅಪಮಾನ. ನಾನು ಸೋತರೆ ಸಮಾಜ ಸೋತಂತೆ, ನಾನು ಗೆದ್ದರೆ ಸಮಾಜ ಗೆದ್ದಂತೆ” ಎಂದು ಅವರು ಘೋಷಿಸಿದರು.

ನಾಯಕರ ಕಡೆಗಣನೆಗೆ ಆಕ್ರೋಶ:

ಕಾಂಗ್ರೆಸ್ ಪಕ್ಷದ ಕೆಲ ನಿರ್ಧಾರಗಳ ವಿರುದ್ಧ ಅಸಮಾಧಾನ ವ್ಯಕ್ತಪಡಿಸಿದ ಅವರು, ಅಲ್ಪಸಂಖ್ಯಾತ ನಾಯಕರಾದ ಜಮೀರ್ ಅಹ್ಮದ್, ನಸೀರ್ ಅಹ್ಮದ್ ಮತ್ತು ತನ್ವೀರ್ ಸೇಠ್ ಅವರಂತಹ ಹಿರಿಯ ಮುಖಂಡರನ್ನು ಕಡೆಗಣಿಸಲಾಗುತ್ತಿದೆ ಎಂದು ದೂರಿದರು. ದಕ್ಷಿಣ ಕ್ಷೇತ್ರದ ಮತದಾರರು ಮತ್ತು ಅಭಿಮಾನಿಗಳು ತಮ್ಮನ್ನು ಮನೆಗೆ ಬಂದು ಭೇಟಿಯಾಗಿ ಚುನಾವಣೆಗೆ ನಿಲ್ಲುವಂತೆ ಒತ್ತಾಯಿಸಿದ್ದಾರೆ. ಜನರ ಪ್ರೀತಿ ಮತ್ತು ವಿಶ್ವಾಸಕ್ಕೆ ಬೆಲೆ ಕೊಟ್ಟು ಈ ನಿರ್ಧಾರ ತಳೆದಿರುವುದಾಗಿ ಅವರು ತಿಳಿಸಿದರು.

Read Also: ಹರಿಹರ: ಇಂದು 3ನೇ ಬಾರಿ ಪೊಲೀಸ್ ವಿಚಾರಣೆಗೆ ಹಾಜರಾಗಲಿರುವ ವಚನಾನಂದ ಸ್ವಾಮೀಜಿ!

ಸಂಧಾನಕ್ಕೆ ಮಣಿಯದ ಪೈಲ್ವಾನ್:

ಮುಖ್ಯಮಂತ್ರಿ ಸಿದ್ದರಾಮಯ್ಯ, ಕೆಪಿಸಿಸಿ ಅಧ್ಯಕ್ಷ ಡಿ.ಕೆ. ಶಿವಕುಮಾರ್ ಸೇರಿದಂತೆ ರಾಜ್ಯಮಟ್ಟದ ಘಟಾನುಘಟಿ ನಾಯಕರು ದೂರವಾಣಿ ಕರೆ ಮಾಡಿ ಮನವೊಲಿಸಲು ಪ್ರಯತ್ನಿಸಿದ್ದಾರೆ. ಆದರೆ, “ಸಮಾಜ ಏನು ತೀರ್ಪು ಕೊಡುತ್ತದೆಯೋ ಅದಕ್ಕೆ ನಾನು ಬದ್ಧ. ಸಮಾಜ ನನ್ನ ಹಿಂದೆ ಇದೆ, ನಾನು ಸಮಾಜದ ಹಿಂದೆ ಇದ್ದೇನೆ” ಎನ್ನುವ ಮೂಲಕ ಹೈಕಮಾಂಡ್ ಸೂಚನೆಯನ್ನು ಪೈಲ್ವಾನ್ ಸಾರಾಸಗಟಾಗಿ ತಿರಸ್ಕರಿಸಿದ್ದಾರೆ.

ಅಂತಿಮ ನಿರ್ಧಾರಕ್ಕೆ 10 ನಿಮಿಷಗಳ ಗಡುವು?

ಒಂದು ವೇಳೆ ಪಕ್ಷದ ನಾಯಕರು ಬಂದು ಜನರ ಮನವೊಲಿಸಿ, ಸಮಾಜಕ್ಕೆ ಮತ್ತು ಊರಿಗೆ ಶಾಂತಿ ಹಾಗೂ ಅಭಿವೃದ್ಧಿಯ ಭರವಸೆ ನೀಡಿದರೆ ಮಾತ್ರ ತಾವು ಪರ್ಯಾಯವಾಗಿ ಯೋಚಿಸುವುದಾಗಿ ಅವರು ಹೇಳಿದ್ದಾರೆ. ಆದರೆ ಸದ್ಯದ ಪರಿಸ್ಥಿತಿಯಲ್ಲಿ ಅವರು ಅಖಾಡದಲ್ಲಿ ಉಳಿಯುವುದು ನೂರಕ್ಕೆ ನೂರರಷ್ಟು ಸತ್ಯ ಎಂದು ಗುಡುಗಿದ್ದಾರೆ.

ಈ ಬೆಳವಣಿಗೆಯಿಂದಾಗಿ ದಾವಣಗೆರೆ ದಕ್ಷಿಣ ಕ್ಷೇತ್ರದಲ್ಲಿ ಕಾಂಗ್ರೆಸ್ ಅಧಿಕೃತ ಅಭ್ಯರ್ಥಿಗೆ ಭಾರಿ ತಲೆನೋವು ಶುರುವಾಗಿದ್ದು, ಮತಗಳ ವಿಭಜನೆಯ ಭೀತಿ ಎದುರಾಗಿದೆ.