ಚುನಾವಣಾ ಅಖಾಡದ ರಣಕಣದಿಂದ ವಿಧಾನಸೌಧದ ಮೆಟ್ಟಿಲವರೆಗೆ: ಮಗ ಸಮರ್ಥ್ ಶಾಮನೂರು ಬೆನ್ನಿಗೆ ನಿಂತ ಸಂಸದೆ ಡಾ. ಪ್ರಭಾ ಮಲ್ಲಿಕಾರ್ಜುನ್

ಕರ್ನಾಟಕದ ರಾಜಕೀಯ ಇತಿಹಾಸದಲ್ಲಿ ದಾವಣಗೆರೆ ಜಿಲ್ಲೆಗೆ ತನ್ನದೇ ಆದ ವಿಶಿಷ್ಟ ಸ್ಥಾನವಿದೆ. ದಾವಣಗೆರೆ ರಾಜಕಾರಣವೆಂದರೆ ತಕ್ಷಣ ನೆನಪಾಗುವುದು ‘ಶಾಮನೂರು’ ಕುಟುಂಬ. ದಶಕಗಳಿಂದ ಈ ಭಾಗದ ಜನರ ನಾಡಿಮಿಡಿತವನ್ನು ಅರಿತು, ರಾಜಕೀಯ ಮತ್ತು ಶೈಕ್ಷಣಿಕ ಕ್ಷೇತ್ರದಲ್ಲಿ ತಮ್ಮದೇ ಆದ ಛಾಪು ಮೂಡಿಸಿರುವ ಈ ಕುಟುಂಬದ ರಾಜಕೀಯ ಪರಂಪರೆ ಇದೀಗ ಮೂರನೇ ತಲೆಮಾರಿಗೆ ಯಶಸ್ವಿಯಾಗಿ ಹಸ್ತಾಂತರವಾಗಿದೆ. ದಾವಣಗೆರೆ ದಕ್ಷಿಣ ವಿಧಾನಸಭಾ ಕ್ಷೇತ್ರದ ಪ್ರಚಾರದ ಅಖಾಡದಿಂದ ಹಿಡಿದು, ವಿಧಾನಸೌಧದ ಭವ್ಯ ಮೆಟ್ಟಿಲುಗಳನ್ನೇರಿ ಮಗ ಸಮರ್ಥ್ ಶಾಮನೂರು ಅವರು ಶಾಸಕರಾಗಿ ಪ್ರಮಾಣ ವಚನ ಸ್ವೀಕರಿಸುವವರೆಗೂ ಓರ್ವ ಆದರ್ಶ ತಾಯಿಯಾಗಿ, ಸಮರ್ಥ ಮಾರ್ಗದರ್ಶಕಿಯಾಗಿ, ಚಾಣಾಕ್ಷ ರಾಜಕಾರಣಿಯಾಗಿ ಬೆನ್ನೆಲುಬಾಗಿ ನಿಂತವರು ದಾವಣಗೆರೆ ಲೋಕಸಭಾ ಕ್ಷೇತ್ರದ ಸಂಸದೆ ಡಾ. ಪ್ರಭಾ ಮಲ್ಲಿಕಾರ್ಜುನ್.

ದಾವಣಗೆರೆ ದಕ್ಷಿಣ: ಒಂದು ರಾಜಕೀಯ ಭದ್ರಕೋಟೆ

ದಾವಣಗೆರೆ ದಕ್ಷಿಣ ವಿಧಾನಸಭಾ ಕ್ಷೇತ್ರ ಶಾಮನೂರು ಕುಟುಂಬದ ಭದ್ರಕೋಟೆ. ಹಿರಿಯ ನಾಯಕ, ‘ದಾವಣಗೆರೆಯ ಭೀಷ್ಮ’ ಎಂದೇ ಕರೆಯಲ್ಪಡುವ ಶಾಸಕ ಶಾಮನೂರು ಶಿವಶಂಕರಪ್ಪನವರ ಕರ್ಮಭೂಮಿ ಇದು. ಇಂತಹ ಒಂದು ಪ್ರತಿಷ್ಠಿತ ಕ್ಷೇತ್ರದಿಂದ ಯುವ ನಾಯಕ ಸಮರ್ಥ್ ಶಾಮನೂರು ಅವರನ್ನು ಕಣಕ್ಕಿಳಿಸಿದಾಗ, ಇಡೀ ರಾಜ್ಯದ ಕಣ್ಣು ದಾವಣಗೆರೆಯತ್ತ ನೆಟ್ಟಿತ್ತು. ಜತಗೆ ಕುಟುಂಬ ರಾಜಕಾರಣದ ಟೀಕೆ, ಟಿಪ್ಪಣಿಗಳು ದಟ್ಟವಾಗಿ ಎದುರಾದವು. ಇತಂಹ ಸಂದರ್ಭದಲ್ಲಿ ಅಜ್ಜ ಶಾಮನೂರು ಶಿವಶಂಕರಪ್ಪನವರ ಆಶೀರ್ವಾದ, ತಂದೆ ಸಚಿವ ಎಸ್.ಎಸ್. ಮಲ್ಲಿಕಾರ್ಜುನ್ ಅವರ ಬೆಂಬಲದ ಜೊತೆಗೆ, ಸಮರ್ಥ್ ಅವರಿಗೆ ಅತಿ ದೊಡ್ಡ ಶಕ್ತಿಯಾಗಿ ನಿಂತದ್ದು ಅವರ ತಾಯಿ ಡಾ. ಪ್ರಭಾ ಮಲ್ಲಿಕಾರ್ಜುನ್.

ಸಾಮಾಜಿಕ ಕಾರ್ಯಕರ್ತೆಯಾಗಿ, ಬಾಪೂಜಿ ವಿದ್ಯಾಸಂಸ್ಥೆಗಳ ರೂವಾರಿಯಾಗಿ, ಲೋಕಸಭಾ ಚುನಾವಣೆಯಲ್ಲಿ ಜಯಭೇರಿ ಬಾರಿಸಿ ಸಂಸದೆಯಾಗಿ ಆಯ್ಕೆಯಾಗಿರುವ ಡಾ. ಪ್ರಭಾ ಮಲ್ಲಿಕಾರ್ಜುನ್ ಅವರಿಗೆ ಜನರೊಡನೆ ಬೆರೆಯುವುದು ಹೊಸತೇನಲ್ಲ. ಆದರೆ, ತನ್ನ ಮಗನ ಭವಿಷ್ಯವನ್ನು ರೂಪಿಸುವ ಈ ಚುನಾವಣಾ ಕಣ ಅವರಿಗೆ ಅತ್ಯಂತ ಭಾವನಾತ್ಮಕ ಹಾಗೂ ಸವಾಲಿನದ್ದಾಗಿತ್ತು.

Read Also: ಕರ್ನಾಟಕದಲ್ಲಿ SIR ನಡೆಸಲು ವೇಳಾಪಟ್ಟಿ ಪ್ರಕಟಿಸಿದ ECI; SIR ಪ್ರಕ್ರಿಯೆ ಯಾವಾಗ ಆರಂಭ?

ಪ್ರಚಾರದ ಅಖಾಡ: ತಾಯಿಯ ರಣತಂತ್ರ ಮತ್ತು ಶ್ರಮ

ಚುನಾವಣಾ ದಿನಾಂಕ ಘೋಷಣೆಯಾಗುತ್ತಿದ್ದಂತೆಯೇ, ಡಾ. ಪ್ರಭಾ ಮಲ್ಲಿಕಾರ್ಜುನ್ ಅವರು ಸಂಪೂರ್ಣವಾಗಿ ಪ್ರಚಾರದ ಅಖಾಡಕ್ಕೆ ಧುಮುಕಿದರು. ದಾವಣಗೆರೆಯ ಸುಡುಬಿಸಿಲನ್ನೂ ಲೆಕ್ಕಿಸದೆ, ಮುಂಜಾನೆಯಿಂದ ತಡರಾತ್ರಿಯವರೆಗೂ ಬಿಡುವಿಲ್ಲದ ಪ್ರಚಾರ ಕಾರ್ಯದಲ್ಲಿ ತೊಡಗಿಸಿಕೊಂಡರು.

೧. ಮಹಿಳಾ ಮತದಾರರ ಒಗ್ಗೂಡುವಿಕೆ:

ತಮ್ಮದೇ ಆದ ವಿಶಿಷ್ಟ ಶೈಲಿಯಲ್ಲಿ ಮಹಿಳಾ ಮತದಾರರನ್ನು ತಲುಪುವುದು ಡಾ. ಪ್ರಭಾ ಅವರ ಮೊದಲ ತಂತ್ರವಾಗಿತ್ತು. ಮನೆಮನೆಗೆ ಭೇಟಿ ನೀಡಿ, ಮಹಿಳೆಯರ ಕಷ್ಟಸುಖಗಳನ್ನು ಆಲಿಸುತ್ತಾ, ಸಮರ್ಥ್ ಅವರ ಭವಿಷ್ಯದ ಯೋಜನೆಗಳನ್ನು ಸರಳವಾಗಿ ವಿವರಿಸಿದರು. ಕ್ಷೇತ್ರದ ಮತದಾರರ ಭಾವನೆಗಳಿಗೆ ತಕ್ಕಂತೆ ಕೆಲಸ ಮಾಡುವಂತೆ ಮಗನಿಗೆ ಕಿವಿಮಾತು ಹೇಳಿ ಮಗನ ಬೆನ್ನ ಹಿಂದೆ ನಿಂತು ಕೆಲಸ ಮಾಡಿದರು.

೨. ಯುವಜನತೆಯೊಂದಿಗೆ ಸಂವಾದ:
ಸಮರ್ಥ್ ಓರ್ವ ಯುವ ನಾಯಕನಾಗಿದ್ದರಿಂದ, ಯುವಜನತೆಯ ಬೆಂಬಲ ಅತ್ಯಗತ್ಯವಾಗಿತ್ತು. ಡಾ. ಪ್ರಭಾ ಅವರು ಕಾಲೇಜು ವಿದ್ಯಾರ್ಥಿಗಳು, ಯುವ ಸಂಘಟನೆಗಳು ಹಾಗೂ ಪ್ರಥಮ ಬಾರಿಗೆ ಮತದಾನ ಮಾಡುತ್ತಿರುವ ಯುವಕರೊಂದಿಗೆ ನಿರಂತರ ಸಂವಾದಗಳನ್ನು ಏರ್ಪಡಿಸಿದರು. ಶಾಮನೂರು ಕುಟುಂಬ ದಾವಣಗೆರೆಯ ಅಭಿವೃದ್ಧಿಗೆ, ವಿಶೇಷವಾಗಿ ಶಿಕ್ಷಣ ಮತ್ತು ಉದ್ಯೋಗ ಕ್ಷೇತ್ರಕ್ಕೆ ನೀಡಿರುವ ಕೊಡುಗೆಗಳನ್ನು ನೆನಪಿಸುತ್ತಾ, ಸಮರ್ಥ್ ಅವರ ನಾಯಕತ್ವದಲ್ಲಿ ಇನ್ನಷ್ಟು ಅಭಿವೃದ್ಧಿಯ ಭರವಸೆ ಮೂಡಿಸಿದರು.

೩. ಬೂತ್ ಮಟ್ಟದ ಕಾರ್ಯಕರ್ತರ ನಿರ್ವಹಣೆ:

ಕೇವಲ ಭಾಷಣಗಳಿಗೆ ಸೀಮಿತವಾಗದೆ, ಬೂತ್ ಮಟ್ಟದ ಕಾರ್ಯಕರ್ತರನ್ನು ಹುರಿದುಂಬಿಸುವ ಕೆಲಸವನ್ನು ಡಾ. ಪ್ರಭಾ ಅತ್ಯಂತ ಅಚ್ಚುಕಟ್ಟಾಗಿ ಮಾಡಿದರು. ಪ್ರತಿ ವಾರ್ಡ್‌ನ ಮುಖಂಡರೊಂದಿಗೆ ಸಭೆ ನಡೆಸಿ, ಪ್ರಚಾರದ ಕಾರ್ಯತಂತ್ರಗಳನ್ನು ರೂಪಿಸಿದರು. ಎದುರಾಳಿಗಳ ಟೀಕೆಗಳಿಗೆ ತಲೆಕೆಡಿಸಿಕೊಳ್ಳದೆ, ಕೇವಲ ಅಭಿವೃದ್ಧಿಯ ಅಜೆಂಡಾದೊಂದಿಗೆ ಮುಂದಡಿ ಇಡುವಂತೆ ಮಗನಿಗೆ ಹಾಗೂ ಕಾರ್ಯಕರ್ತರಿಗೆ ಕಟ್ಟುನಿಟ್ಟಿನ ಸೂಚನೆ ನೀಡಿದರು.

ಮಗನಿಗೆ ಮಾನಸಿಕ ಸ್ಥೈರ್ಯ

ಚುನಾವಣಾ ಕಣ ಎಂದರೆ ಟೀಕೆ, ಒತ್ತಡ, ಆಯಾಸ ಎಲ್ಲವೂ ಸಹಜ. ಮೊದಲ ಬಾರಿಗೆ ಇಷ್ಟು ದೊಡ್ಡ ಜವಾಬ್ದಾರಿಯನ್ನು ಹೊತ್ತಿದ್ದ ಸಮರ್ಥ್ ಅವರಿಗೆ ಮಾನಸಿಕ ಸ್ಥೈರ್ಯ ತುಂಬುವಲ್ಲಿ ಡಾ. ಪ್ರಭಾ ಅವರ ಪಾತ್ರ ಹಿರಿದಾದದ್ದು. ಪ್ರಚಾರದ ಬಳಿಕ ಮನೆಗೆ ಬಂದಾಗ, ಒಬ್ಬ ರಾಜಕಾರಣಿಯಾಗಿ ಮಗನ ತಪ್ಪು-ಒಪ್ಪುಗಳನ್ನು ವಿಮರ್ಶಿಸುತ್ತಲೇ, ಓರ್ವ ತಾಯಿಯಾಗಿ ರಾಜಕೀಯದ ತಿಳಿವಳಿಕೆ ನೀಡಿದ್ದರು.

ತಮ್ಮ ತಾಯಿಯ ಈ ಬೆಂಬಲದ ಬಗ್ಗೆ ಚುನಾವಣೆ ಪ್ರಚಾರದ ವೇಳೆ ಒಮ್ಮೆ ಮಾತನಾಡಿದ್ದ ಸಮರ್ಥ್, “ನನ್ನ ಗೆಲುವಿನ ಹಿಂದಿನ ಅತಿದೊಡ್ಡ ಶಕ್ತಿ ನನ್ನ ತಾಯಿ. ನಾನು ಸುಸ್ತಾದಾಗಲೆಲ್ಲಾ ಅವರು ನನಗಿಂತ ದುಪ್ಪಟ್ಟು ಉತ್ಸಾಹದಿಂದ ಕೆಲಸ ಮಾಡುತ್ತಿರುವುದನ್ನು ನೋಡಿ ನನಗೆ ಹೊಸ ಚೈತನ್ಯ ಬರುತ್ತಿತ್ತು. ನನ್ನ ಪ್ರತಿಯೊಂದು ಹೆಜ್ಜೆಯಲ್ಲೂ ಅವರ ಮಾರ್ಗದರ್ಶನವಿದೆ,” ಎಂದು ಭಾವುಕರಾಗಿ ನುಡಿದಿದ್ದರು.

ವಿರೋಧಿಗಳ ತಂತ್ರಗಳಿಗೆ ತಕ್ಕ ಪ್ರತ್ಯುತ್ತರ

ರಾಜಕೀಯದಲ್ಲಿ ವಂಶವಾದದ ಆರೋಪಗಳು ಬರುವುದು ಸಾಮಾನ್ಯ. ಸಮರ್ಥ್ ಶಾಮನೂರು ಕಣಕ್ಕಿಳಿದಾಗಲೂ ವಿರೋಧಿಗಳು ಇದೇ ಅಸ್ತ್ರವನ್ನು ಪ್ರಯೋಗಿಸಿದರು. ಆದರೆ, ಡಾ. ಪ್ರಭಾ ಮಲ್ಲಿಕಾರ್ಜುನ್ ಅವರು ಅತ್ಯಂತ ಪ್ರಬುದ್ಧವಾಗಿ ಇದನ್ನು ಎದುರಿಸಿದರು. “ಸಮರ್ಥ್ ಕೇವಲ ಶಾಮನೂರು ಕುಟುಂಬದ ಕುಡಿ ಎಂಬ ಕಾರಣಕ್ಕೆ ಟಿಕೆಟ್ ಪಡೆದಿಲ್ಲ. ಆತ ತನ್ನದೇ ಆದ ಸಾಮಾಜಿಕ ಕೆಲಸಗಳ ಮೂಲಕ, ಯುವಜನತೆಯೊಂದಿಗಿನ ಒಡನಾಟದ ಮೂಲಕ ತನ್ನ ಸಾಮರ್ಥ್ಯವನ್ನು ಸಾಬೀತುಪಡಿಸಿದ್ದಾನೆ. ಪ್ರಜಾಪ್ರಭುತ್ವದಲ್ಲಿ ಅಂತಿಮ ತೀರ್ಪುಗಾರರು ಜನತೆ,” ಎಂದು ಸ್ಪಷ್ಟವಾಗಿ ತಿರುಗೇಟು ನೀಡಿದರು. ಅವರ ಈ ದಿಟ್ಟ ನಿಲುವು ಕ್ಷೇತ್ರದ ಜನರಲ್ಲಿ ಸಮರ್ಥ್ ಮೇಲಿನ ನಂಬಿಕೆಯನ್ನು ಮತ್ತಷ್ಟು ಗಟ್ಟಿಗೊಳಿಸಿತು.

ವಿಧಾನಸೌಧದಲ್ಲಿ ಪ್ರಮಾಣ ವಚನ

ಹಲವು ದಿನಗಳ ಕಾಲ ನಡೆದ ಹಗಲಿರುಳಿನ ಶ್ರಮ, ಲಕ್ಷಾಂತರ ಕಾರ್ಯಕರ್ತರ ಬೆವರು, ಮತ್ತು ಓರ್ವ ತಾಯಿಯ ಸತತ ಪ್ರಾರ್ಥನೆ ಫಲ ನೀಡುವ ದಿನ ಬಂದೇ ಬಿಟ್ಟಿತು. ಚುನಾವಣಾ ಫಲಿತಾಂಶ ಪ್ರಕಟವಾದಾಗ, ದಾವಣಗೆರೆ ದಕ್ಷಿಣ ಕ್ಷೇತ್ರದ ಮತದಾರರು ಸಮರ್ಥ್ ಶಾಮನೂರು ಅವರ ಕೈಹಿಡಿದಿದ್ದರು. ಅಂತಿಮವಾಗಿ ಸಮರ್ಥ್ ಶಾಮನೂರು ವಿಜಯಶಾಲಿಯಾದರು.

ಬೆಂಗಳೂರಿನ ವಿಧಾನಸೌಧದಲ್ಲಿ. ಪ್ರಜಾಪ್ರಭುತ್ವದ ದೇಗುಲ ಎಂದೇ ಕರೆಯಲ್ಪಡುವ ವಿಧಾನಸೌಧದ ಬ್ಯಾಂಕ್ವೆಟ್ ಹಾಲ್‌ನಲ್ಲಿ, ನೂತನ ಶಾಸಕರಾಗಿ ಸಮರ್ಥ್ ಶಾಮನೂರು ಪ್ರಮಾಣ ವಚನ ಸ್ವೀಕರಿಸಲು ವೇದಿಕೆಯತ್ತ ಹೆಜ್ಜೆ ಹಾಕುವಾಗ ಕೂಡ ಅವರ ಹಿಂದೆ ತಾಯಿ ಡಾ.ಪ್ರಭಾ ಮಲ್ಲಿಕಾರ್ಜುನ್‌ ಇದ್ದರು. ಸಮರ್ಥ್‌ ತನ್ನ ತಾತ ಡಾ.ಶಾಮನೂರು ಶಿವಶಂಕರಪ್ಪ ಅವರ ಹೆಸರಿನಲ್ಲಿ ಪ್ರಮಾಣ ವಚನ ಸ್ವೀಕರಿಸುವ ವೇಳೆ ಹಿಂದೆ ನಿಂತು ಸಂತಸ ಪಟ್ಟರು. ದಾವಣಗೆರೆಯಿಂದ ಆರಂಭವಾದ ಹೋರಾಟ, ರಾಜ್ಯದ ಶಕ್ತಿ ಕೇಂದ್ರದಲ್ಲಿ ಮಗನಿಗೆ ಒಂದು ಸ್ಥಾನ ಕಲ್ಪಿಸುವಲ್ಲಿ ಯಶಸ್ವಿಯಾಗಿತ್ತು.