ಚಿತ್ರದುರ್ಗದ ಕೋಟೆ ಹೊಂಡದಲ್ಲಿ ಮೊಸಳೆ ಭೀತಿ: ಎಚ್ಚರಿಕೆ ಕಡೆಗಣಿಸಿ ಯುವಕರ ಈಜಾಟ, ಸ್ಥಳೀಯರ ಆಕ್ರೋಶ

ಚಿತ್ರದುರ್ಗ: ಇಲ್ಲಿನ ಪ್ರಸಿದ್ಧ ಏಳು ಸುತ್ತಿನ ಕೋಟೆಯ ಸಮೀಪವಿರುವ ಹೊಂಡದಲ್ಲಿ ಕಳೆದ ಒಂದು ವರ್ಷದಿಂದ ಮೊಸಳೆಯೊಂದು ಕಾಣಿಸಿಕೊಂಡಿದ್ದು, ಸ್ಥಳೀಯರಲ್ಲಿ ತೀವ್ರ ಆತಂಕ ಮೂಡಿಸಿದೆ. ಈ ಹೊಂಡವು ಮುಂಚಿನಿಂದಲೂ ಸ್ಥಳೀಯ ಯುವಕರಿಗೆ ಈಜಾಡಲು ನೆಚ್ಚಿನ ತಾಣವಾಗಿದೆ. ಆದರೆ ಈಗ ಮೊಸಳೆ ಇರುವುದು ಗೊತ್ತಿದ್ದರೂ ಸಹ, ಯುವಕರು ಅಪಾಯವನ್ನು ಲೆಕ್ಕಿಸದೆ ಹೊಂಡಕ್ಕಿಳಿದು ಈಜಾಡುತ್ತಿದ್ದಾರೆ.

ಹೊಂಡದ ಸುತ್ತಲೂ ಜಿಲ್ಲಾಡಳಿತ ಹಾಗೂ ಅರಣ್ಯ ಇಲಾಖೆ ವತಿಯಿಂದ ‘ಮೊಸಳೆ ಇದೆ, ಎಚ್ಚರಿಕೆ’ ಎಂಬ ಫಲಕಗಳನ್ನು ಹಾಕಲಾಗಿದೆಯಾದರೂ, ಯುವಕರು ಮಾತ್ರ ಇದನ್ನು ಗಂಭೀರವಾಗಿ ಪರಿಗಣಿಸುತ್ತಿಲ್ಲ. ಇದರಿಂದಾಗಿ ಯಾವುದೇ ಕ್ಷಣದಲ್ಲಾದರೂ ದೊಡ್ಡ ಅನಾಹುತ ಸಂಭವಿಸುವ ಸಾಧ್ಯತೆಯಿದೆ ಎಂದು ಪೋಷಕರು ತೀವ್ರ ಕಳವಳ ವ್ಯಕ್ತಪಡಿಸಿದ್ದಾರೆ.

ಜಿಲ್ಲಾಡಳಿತ ಮತ್ತು ಅರಣ್ಯ ಇಲಾಖೆಯು ಕೇವಲ ಎಚ್ಚರಿಕೆ ಫಲಕ ಹಾಕಿ ಕೈತೊಳೆದುಕೊಂಡಿರುವುದಕ್ಕೆ ಸಾರ್ವಜನಿಕರು ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಯುವಕರ ಪ್ರಾಣಕ್ಕೆ ಸಂಚಕಾರ ಬರುವ ಮುನ್ನವೇ ಅರಣ್ಯ ಇಲಾಖೆ ಎಚ್ಚೆತ್ತುಕೊಂಡು, ಹೊಂಡದಲ್ಲಿರುವ ಮೊಸಳೆಯನ್ನು ತಕ್ಷಣವೇ ಸೆರೆಹಿಡಿದು ಬೇರೆ ಸುರಕ್ಷಿತ ಸ್ಥಳಕ್ಕೆ ಸ್ಥಳಾಂತರಿಸಬೇಕು ಎಂದು ಸಾರ್ವಜನಿಕರು ಹಾಗೂ ಪೋಷಕರು ಒತ್ತಾಯಿಸಿದ್ದಾರೆ.

Read Also: ಚಿತ್ರದುರ್ಗ ಜಿಲ್ಲೆಯ ಸ್ವಸಹಾಯ ಗುಂಪಿನ ಮಹಿಳೆಯರಿಗೆ ಸಹಾಯಧನದಲ್ಲಿ ಹಸು, ಎಮ್ಮೆ ವಿತರಣೆ: ಅರ್ಜಿ ಆಹ್ವಾನ