ಚಿತ್ರದುರ್ಗ: ಮದುವೆಗೆ ಎರಡೇ ತಿಂಗಳು ಬಾಕಿ ಇರುವಾಗಲೇ ಬಾಲ್ಯ ವಿವಾಹ ತಡೆದ 112 ಪೊಲೀಸ್ ಸಿಬ್ಬಂದಿ!

ಚಿತ್ರದುರ್ಗ: ಜಿಲ್ಲೆಯಲ್ಲಿ ಬಾಲ್ಯ ವಿವಾಹ ಎಂಬ ಸಾಮಾಜಿಕ ಪಿಡುಗಿನ ವಿರುದ್ಧ ಪೊಲೀಸ್ ಇಲಾಖೆ ಸಮರ ಸಾರಿದ್ದು, ಮೊಣಕಾಲ್ಮೂರು ತಾಲ್ಲೂಕಿನ ಬಿಜಿಕೆರೆ ಗ್ರಾಮದಲ್ಲಿ ನಡೆಯಲಿದ್ದ ಮತ್ತೊಂದು ಬಾಲ್ಯ ವಿವಾಹವನ್ನು ಯಶಸ್ವಿಯಾಗಿ ತಡೆಯುವಲ್ಲಿ 112 ತುರ್ತು ಸ್ಪಂದನಾ ತಂಡ ಯಶಸ್ವಿಯಾಗಿದೆ.

ನಡೆದಿದ್ದೇನು?

ಕಳೆದ ಮೇ 14ರಂದು ಮೊಣಕಾಲ್ಮೂರು ತಾಲ್ಲೂಕಿನ ಬಿಜಿಕೆರೆ ಗ್ರಾಮದ ಹರಿಜನ ಕಾಲೋನಿಯಲ್ಲಿ ಅಪ್ರಾಪ್ತ ಬಾಲಕಿಯ ವಿವಾಹ ನಡೆಯುತ್ತಿದೆ ಎಂಬ ರಹಸ್ಯ ಮಾಹಿತಿ ‘ನಮ್ಮ 112’ ಸಹಾಯವಾಣಿಗೆ ಬಂದಿತ್ತು. ಮಾಹಿತಿ ಸಿಕ್ಕ ತಕ್ಷಣ ಎಚ್ಚೆತ್ತ ಇ.ಆರ್.ಎಸ್.ಎಸ್ (ERSS) ಕೇಂದ್ರದ ಸಿಬ್ಬಂದಿ ಚಂದ್ರಣ್ಣ ಬಿ.ಟಿ., ತಕ್ಷಣವೇ ಹೊಯ್ಸಳ-11 ವಾಹನಕ್ಕೆ ಸಂದೇಶ ರವಾನಿಸಿದರು.

ಸ್ಥಳಕ್ಕೆ ದೌಡಾಯಿಸಿದ ಹೊಯ್ಸಳ ಪಡೆ

ಮಾಹಿತಿ ಲಭ್ಯವಾಗುತ್ತಿದ್ದಂತೆ ಹೊಯ್ಸಳ-11 ವಾಹನದ ಅಧಿಕಾರಿ ವಿಜಯಕುಮಾರ್ ಎಂ.ಜಿ. ಹಾಗೂ ಚಾಲಕ ರಂಗನಾಥ ಪಿ. ಅವರು ಘಟನಾ ಸ್ಥಳಕ್ಕೆ ದೌಡಾಯಿಸಿದರು. ಅಲ್ಲಿ ಮದುವೆಯ ಸಿದ್ಧತೆಗಳನ್ನು ಪರಿಶೀಲಿಸಿದಾಗ ಅಚ್ಚರಿಯ ವಿಷಯವೊಂದು ಬೆಳಕಿಗೆ ಬಂದಿದೆ. ವಧುವಿಗೆ 18 ವರ್ಷ ತುಂಬಲು ಇನ್ನೂ ಕೇವಲ 02 ತಿಂಗಳು ಬಾಕಿ ಇತ್ತು. ಕಾನೂನುಬದ್ಧ ವಯಸ್ಸಿನ ಮಿತಿ ಮೀರಿ ಮದುವೆ ಮಾಡುವುದು ಅಪರಾಧವಾದ್ದರಿಂದ ಪೊಲೀಸರು ತಕ್ಷಣ ಕಾರ್ಯಪ್ರವೃತ್ತರಾದರು.

Read Also: ಚಿತ್ರದುರ್ಗದ 23 ಸಾವಿರಕ್ಕೂ ಹೆಚ್ಚು ವಿದ್ಯಾರ್ಥಿನಿಯರಿಗೆ ಉಚಿತ ಹೆಚ್‌ಪಿವಿ ಲಸಿಕೆ: ಶಿಕ್ಷಣ ಇಲಾಖೆ ಮಹತ್ವದ ಆದೇಶ!

ಬಾಲಕಿಯ ರಕ್ಷಣೆ

ಪೊಲೀಸ್ ಅಧಿಕಾರಿಗಳು ಬಾಲಕಿಯ ಪೋಷಕರಿಗೆ ಬಾಲ್ಯ ವಿವಾಹದ ದುಷ್ಪರಿಣಾಮ ಹಾಗೂ ಕಾನೂನು ಕ್ರಮಗಳ ಬಗ್ಗೆ ತಿಳುವಳಿಕೆ ನೀಡಿದರು. ಬಳಿಕ ಬಾಲಕಿಯನ್ನು ಸುರಕ್ಷಿತವಾಗಿ ರಕ್ಷಿಸಿ, ಸ್ಥಳಕ್ಕೆ ಬಂದ ಅಂಗನವಾಡಿ ಕಾರ್ಯಕರ್ತೆಯರ ಸುಪರ್ದಿಗೆ ಒಪ್ಪಿಸಿದರು. ಈ ಸಂಬಂಧ ಮುಂದಿನ ಕ್ರಮಗಳಿಗಾಗಿ ಸಿಡಿಪಿಒ (CDPO) ಕಚೇರಿಗೂ ಮಾಹಿತಿ ನೀಡಲಾಗಿದೆ.

ಎಸ್ಪಿ ಶ್ಲಾಘನೆ

ಸರಿಯಾದ ಸಮಯಕ್ಕೆ ಸ್ಪಂದಿಸಿ ಒಂದು ಬಾಳನ್ನು ಉಳಿಸಿದ ಹೊಯ್ಸಳ-11 ತಂಡದ ಸಮಯಪ್ರಜ್ಞೆಯನ್ನು ಚಿತ್ರದುರ್ಗ ಜಿಲ್ಲಾ ಪೊಲೀಸ್ ಅಧೀಕ್ಷಕರಾದ ಶ್ರೀ ರಂಜಿತ್ ಕುಮಾರ್ ಬಂಡಾರು, ಐಪಿಎಸ್ ಅವರು ಮುಕ್ತಕಂಠದಿಂದ ಶ್ಲಾಘಿಸಿದ್ದಾರೆ.

ಸಾರ್ವಜನಿಕರಿಗೆ ಕಿವಿಮಾತು: ನಿಮ್ಮ ಸುತ್ತಮುತ್ತ ಎಲ್ಲೇ ಬಾಲ್ಯ ವಿವಾಹ ಅಥವಾ ಕಾನೂನು ಬಾಹಿರ ಚಟುವಟಿಕೆಗಳು ನಡೆಯುತ್ತಿದ್ದರೆ ತಡಮಾಡದೆ ಉಚಿತ ಸಹಾಯವಾಣಿ ಸಂಖ್ಯೆ 112 ಕ್ಕೆ ಕರೆ ಮಾಡಿ ಮಾಹಿತಿ ನೀಡಿ. ನಿಮ್ಮ ಹೆಸರು ಮತ್ತು ಮಾಹಿತಿಯನ್ನು ಗೌಪ್ಯವಾಗಿಡಲಾಗುವುದು.