ದಾವಣಗೆರೆ: ನೋ ಪಾರ್ಕಿಂಗ್’ನಲ್ಲಿ ಗಾಡಿ ನಿಲ್ಲಿಸಿದ್ರೆ ಜೇಬಿಗೆ ಕತ್ತರಿ; ಫೀಲ್ಡಿಗಿಳಿದಿದೆ ‘ಜೀಬ್ರಾ’ ಪಡೆ!

ದಾವಣಗೆರೆ: ನಗರದಲ್ಲಿ ಎಲ್ಲೆಂದರಲ್ಲಿ ವಾಹನ ನಿಲ್ಲಿಸಿ ಹೋಗುವವರೇ, ಟ್ರಾಫಿಕ್ ರೂಲ್ಸ್ ಬ್ರೇಕ್ ಮಾಡುವವರೇ ಹುಷಾರ್! ಬೆಣ್ಣೆನಗರಿಯ ರಸ್ತೆಗಳಲ್ಲಿ ಶಿಸ್ತು ಕಾಪಾಡಲು ಪೊಲೀಸ್ ಇಲಾಖೆಯ ಬತ್ತಳಿಕೆಗೆ ಈಗ ಹೊಸ ಅಸ್ತ್ರವೊಂದು ಸೇರ್ಪಡೆಯಾಗಿದೆ. ಇನ್ಮುಂದೆ ‘ನೋ ಪಾರ್ಕಿಂಗ್’ನಲ್ಲಿ ಗಾಡಿ ನಿಲ್ಲಿಸಿದರೆ ಕ್ಷಣಾರ್ಧದಲ್ಲೇ ನಿಮ್ಮ ವಾಹನ ‘ಜೀಬ್ರಾ’ ಪಾಲಾಗಲಿದೆ.

ಹೌದು, ದಾವಣಗೆರೆ ಮಹಾನಗರ ಪಾಲಿಕೆಯು ‘ರಾಷ್ಟ್ರೀಯ ಶುದ್ಧ ಗಾಳಿ ಯೋಜನೆ’ಯ ಅಡಿಯಲ್ಲಿ ಜಿಲ್ಲಾ ಪೊಲೀಸ್ ಇಲಾಖೆಗೆ ಎರಡು ಅತ್ಯಾಧುನಿಕ ‘ಜೀಬ್ರಾ ಟೋಯಿಂಗ್ ವಾಹನ’ಗಳನ್ನು (Zebra Towing Vehicles) ಹಸ್ತಾಂತರಿಸಿದೆ. ಸಂಸದೆ ಡಾ. ಪ್ರಭಾ ಮಲ್ಲಿಕಾರ್ಜುನ್ ಅವರು ಹಸಿರು ನಿಶಾನೆ ತೋರುವ ಮೂಲಕ ಈ ಹೈಟೆಕ್ ವಾಹನಗಳಿಗೆ ಚಾಲನೆ ನೀಡಿದರು.

ಜೀಬ್ರಾ ಟೋಯಿಂಗ್ ವಾಹನ ವಿಶೇಷ ? ವಾಹನ ಸವಾರರಿಗೆ ಸಂಕಷ್ಟ ಕಟ್ಟಿಟ್ಟ ಬುತ್ತಿನಾ?

ಈ ‘ಜೀಬ್ರಾ’ ಕೇವಲ ವಾಹನ ಎತ್ತುವ ಟೋಯಿಂಗ್ ಗಾಡಿಯಲ್ಲ, ಇದೊಂದು ಸಂಚಾರಿ ಲ್ಯಾಬ್ ಕೂಡ ಹೌದು! ಇದರ ಪ್ರಮುಖ ಕಾರ್ಯಗಳೇನು ನೋಡಿ:

Read Also: ಭದ್ರಾ ಜಲಾಶಯದ ಇಂದಿನ ನೀರಿನ ಮಟ್ಟ (02/03/2026): ಬೇಸಿಗೆ ಆರಂಭಕ್ಕೂ ಮುನ್ನ ಡ್ಯಾಂನಲ್ಲಿ ಎಷ್ಟಿದೆ ನೀರು?

• ನೋ ಪಾರ್ಕಿಂಗ್ ಬೇಟೆ: ನಗರದ ಪ್ರಮುಖ ರಸ್ತೆಗಳಲ್ಲಿ ಸಂಚಾರಕ್ಕೆ ಅಡ್ಡಿಯಾಗುವಂತೆ ನಿಲ್ಲಿಸುವ ವಾಹನಗಳನ್ನು ಈ ಜೀಬ್ರಾ ವಾಹನಗಳು ನಿರ್ದಾಕ್ಷಿಣ್ಯವಾಗಿ ಟೋಯಿಂಗ್ ಮಾಡಲಿವೆ.

• ಸ್ಥಳದಲ್ಲೇ ಎಮಿಷನ್ ಟೆಸ್ಟ್: ಇದು ಈ ವಾಹನದ ಅತಿದೊಡ್ಡ ಹೈಲೈಟ್. ಅತಿಯಾದ ಹೊಗೆ ಉಗುಳುವ ವಾಹನಗಳನ್ನು ತಡೆದು, ಸ್ಥಳದಲ್ಲೇ ವಾಯು ಮಾಲಿನ್ಯ ತಪಾಸಣೆ (Emission Test) ಮಾಡಲಾಗುವುದು. ಮಾಲಿನ್ಯ ನಿಯಂತ್ರಣ ಮಿತಿಗಿಂತ ಹೆಚ್ಚು ಹೊಗೆ ಕಂಡುಬಂದರೆ ಸ್ಪಾಟ್‌ನಲ್ಲೇ ದಂಡ ಫಿಕ್ಸ್!

• ಅಪಘಾತ ನಿರ್ವಹಣೆ: ರಾಷ್ಟ್ರೀಯ ಹೆದ್ದಾರಿ ಅಥವಾ ನಗರದ ರಸ್ತೆಗಳಲ್ಲಿ ಅಪಘಾತ ಸಂಭವಿಸಿದರೆ, ಜಖಂಗೊಂಡ ವಾಹನಗಳನ್ನು ತ್ವರಿತವಾಗಿ ರಸ್ತೆಯಿಂದ ತೆರವುಗೊಳಿಸಲು ಈ ವಾಹನ ನೆರವಾಗಲಿದೆ.

ದಂಡ ಪಾವತಿಗೆ 7 ದಿನಗಳ ಕಾಲಾವಕಾಶ: ನಿಯಮ ಉಲ್ಲಂಘಿಸಿದ ವಾಹನ ಸವಾರರಿಗೆ ಸ್ಥಳದಲ್ಲೇ ದಂಡ ವಿಧಿಸಲಾಗುತ್ತದೆ. ಒಂದು ವೇಳೆ ಸ್ಥಳದಲ್ಲಿ ದಂಡ ಕಟ್ಟಲು ಸಾಧ್ಯವಾಗದಿದ್ದರೆ, ನೋಟಿಸ್ ಪಡೆದ 7 ದಿನಗಳ ಒಳಗಾಗಿ ದಂಡ ಪಾವತಿಸಲು ಅವಕಾಶ ಕಲ್ಪಿಸಲಾಗಿದೆ ಎಂದು ಪೊಲೀಸ್ ಅಧಿಕಾರಿಗಳು ತಿಳಿಸಿದ್ದಾರೆ.

ಒಟ್ಟಿನಲ್ಲಿ ಸ್ಮಾರ್ಟ್ ಸಿಟಿ ದಾವಣಗೆರೆಯಲ್ಲಿ ಟ್ರಾಫಿಕ್ ಕಿರಿಕಿರಿ ತಪ್ಪಿಸಲು ಮತ್ತು ಸ್ವಚ್ಛ ಗಾಳಿಗಾಗಿ ‘ಜೀಬ್ರಾ’ ಈಗ ರಸ್ತೆಗಿಳಿದಿದೆ. ವಾಹನ ಸವಾರರು ಎಚ್ಚೆತ್ತುಕೊಳ್ಳುವುದು ಒಳಿತು.

#Davanagere #DavanagerePolice #TrafficRules #ZebraTowing #DrPrabhaMallikarjun #SmartCityDavanagere #EmissionTest #RoadSafety #KarnatakaNews