ದಾವಣಗೆರೆ ವಿವಿ ಘಟಿಕೋತ್ಸವ:‌ ಕೃಷಿಕನ ಮಗಳ ಮುಡಿಗೆ 7 ಚಿನ್ನದ ಪದಕ; ಎನ್.ಬಿ. ನಯನಾ ವಿವಿಯ ‘ಚಿನ್ನದ ಹುಡುಗಿ’!

ದಾವಣಗೆರೆ: ದಾವಣಗೆರೆ ವಿಶ್ವವಿದ್ಯಾನಿಲಯದ 13ನೇ ವಾರ್ಷಿಕ ಘಟಿಕೋತ್ಸವಕ್ಕೆ ವೇದಿಕೆ ಸಜ್ಜಾಗಿದ್ದು, ಈ ಬಾರಿ ಗ್ರಾಮೀಣ ಪ್ರತಿಭೆಗಳೇ ಮೇಲುಗೈ ಸಾಧಿಸಿವೆ. ಸ್ನಾತಕೋತ್ತರ ವಾಣಿಜ್ಯ ವಿಭಾಗದ (M.Com) ವಿದ್ಯಾರ್ಥಿನಿ ಎನ್.ಬಿ. ನಯನಾ ಬರೋಬ್ಬರಿ 7 ಚಿನ್ನದ ಪದಕಗಳನ್ನು ಬಾಚಿಕೊಳ್ಳುವ ಮೂಲಕ ವಿಶ್ವವಿದ್ಯಾಲಯದ ‘ಚಿನ್ನದ ಹುಡುಗಿ’ಯಾಗಿ ಹೊರಹೊಮ್ಮಿದ್ದಾರೆ.

🏆 ವಿವಿಯ ‘ಚಿನ್ನದ ಹುಡುಗಿ’ಯ ಬೆರಗಾಗಿಸುವ ಸಾಧನೆ

 ರೈತನ ಮಗಳ ಬಂಗಾರದ ಸಾಧನೆ: ಹರಿಹರ ತಾಲೂಕಿನ ಜಿಗಳಿ ಗ್ರಾಮದ ನಯನಾ ಅವರದ್ದು ಕಡುಬಡತನವನ್ನೇ ಮೆಟ್ಟಿ ನಿಂತ ಸಾಧನೆ. ತಂದೆ ಭರಮನಗೌಡ ಮತ್ತು ತಾಯಿ ಮೀನಾಕ್ಷಿ ಅವರಿಗೆ ಜಮೀನು ಅಲ್ಪಸ್ವಲ್ಪ ಇದೆ. ದಾವಣಗೆರೆಯಲ್ಲಿ ಅಜ್ಜ-ಅಜ್ಜಿಯ ಮನೆಯಲ್ಲಿದ್ದುಕೊಂಡು ವ್ಯಾಸಂಗ ಪೂರೈಸಿದ್ದಾರೆ.

ಐಎಎಸ್ ಕನಸು: ಕೆಎಎಸ್ (KAS) ಮತ್ತು ಐಎಎಸ್ (IAS) ಪರೀಕ್ಷೆಗಳಿಗೆ ಈಗಿನಿಂದಲೇ ಸಿದ್ಧತೆ ನಡೆಸುತ್ತಿದ್ದು, ಸರ್ಕಾರಿ ಆಡಳಿತ ಸೇವೆಯಲ್ಲಿ ಉನ್ನತ ಹುದ್ದೆ ಅಲಂಕರಿಸುವ ಕನಸು ಅವರದ್ದಾಗಿದೆ.

Read Also: ಭದ್ರಾ ಜಲಾಶಯದ ಇಂದಿನ ನೀರಿನ ಮಟ್ಟ (02/03/2026): ಬೇಸಿಗೆ ಆರಂಭಕ್ಕೂ ಮುನ್ನ ಡ್ಯಾಂನಲ್ಲಿ ಎಷ್ಟಿದೆ ನೀರು?

ನನಗೆ ಏಳು ಚಿನ್ನದ ಪದಕ ಬಂದಿರುವುದು ಸಂತಸ ತಂದಿದೆ. ಕಷ್ಟಪಟ್ಟು ಓದಿದಕ್ಕೆ ಪ್ರತಿಫಲ ಸಿಕ್ಕಿದೆ. ಇದಕ್ಕೆ ನನ್ನ ತಂದೆ, ತಾಯಿ ಹಾಗೂ ಕುಟುಂಬದ ಸಹಕಾರ ಹೆಚ್ಚಿದೆ. ಮುಂದಿನ ಸಾಧನೆಗೆ ನನಗೆ ಸ್ಪೂರ್ತಿ ತಂದಿದೆ”
— ನಯನಾ ಎನ್.ಬಿ. ಚಿನ್ನದ ಕುವರಿ

ಘಟಿಕೋತ್ಸವದ ಸಂಪೂರ್ಣ ವಿವರ: ಗುರುವಾರ ನಡೆದ ಸುದ್ದಿಗೋಷ್ಠಿಯಲ್ಲಿ ಕುಲಪತಿ ಪ್ರೊ. ಬಿ.ಟಿ. ಕುಂಬಾರ ಅವರು ಘಟಿಕೋತ್ಸವದ ವಿವರಗಳನ್ನು ಹಂಚಿಕೊಂಡರು.

ಒಟ್ಟು ಪದವಿ: ದಾವಣಗೆರೆ ಮತ್ತು ಚಿತ್ರದುರ್ಗ ಜಿಲ್ಲಾ ವ್ಯಾಪ್ತಿಯ ಒಟ್ಟು 12,706 ವಿದ್ಯಾರ್ಥಿಗಳಿಗೆ ಪದವಿ ಪ್ರದಾನ ಮಾಡಲಾಗುವುದು.

ಚಿನ್ನದ ಪದಕ: ವಿವಿಧ ವಿಭಾಗಗಳಲ್ಲಿ ಅತಿ ಹೆಚ್ಚು ಅಂಕ ಪಡೆದ 45 ವಿದ್ಯಾರ್ಥಿಗಳು ಒಟ್ಟು 87 ಚಿನ್ನದ ಪದಕಗಳನ್ನು ಹಂಚಿಕೊಳ್ಳಲಿದ್ದಾರೆ.

ಸಂಶೋಧನೆ: 70 ಸಂಶೋಧನಾರ್ಥಿಗಳಿಗೆ ಪಿಎಚ್‌ಡಿ ಪದವಿ ನೀಡಿ ಗೌರವಿಸಲಾಗುವುದು.