ಹರಿಹರ ಪಂಚಮಶಾಲಿ ಪೀಠದ 18 ವರ್ಷಗಳ ಲೆಕ್ಕ ಬಹಿರಂಗ: ಮಠಕ್ಕೆ ಬಂದ ದೇಣಿಗೆ ಎಷ್ಟು ಕೋಟಿ ಗೊತ್ತೇ?

ಹರಿಹರ: ಪಂಚಮಶಾಲಿ ಸಮಾಜದ ಪ್ರಮುಖ ಧಾರ್ಮಿಕ ಕೇಂದ್ರವಾದ ಹರಿಹರ ಪೀಠದ ಕಳೆದ 18 ವರ್ಷಗಳ ಆದಾಯ ಮತ್ತು ಖರ್ಚಿನ ಲೆಕ್ಕಾಚಾರವನ್ನು ಪೀಠದ ಆಡಳಿತ ಮಂಡಳಿ ಅಧಿಕೃತವಾಗಿ ಪ್ರಕಟಿಸಿದೆ. ಕಳೆದ ಕೆಲವು ದಿನಗಳಿಂದ ಸಮಾಜದಲ್ಲಿ ಚರ್ಚೆಯಾಗುತ್ತಿದ್ದ “ಲೆಕ್ಕ ಕೊಡಿ” ಚಳವಳಿಗೆ ಈ ಮೂಲಕ ತಾರ್ಕಿಕ ಅಂತ್ಯ ನೀಡಲು ಮಠ ಮುಂದಾಗಿದೆ.

27 ಕೋಟಿಗೂ ಅಧಿಕ ದೇಣಿಗೆ ಸಂಗ್ರಹ

ಪೀಠದ ಆಡಳಿತ ಮಂಡಳಿಯ ಪ್ರಮುಖರು ನೀಡಿರುವ ಮಾಹಿತಿಯ ಪ್ರಕಾರ, ಕಳೆದ 18 ವರ್ಷಗಳಲ್ಲಿ ಸರ್ಕಾರ, ಸಮಾಜದ ದಾನಿಗಳು ಮತ್ತು ಭಕ್ತಾದಿಗಳಿಂದ ಒಟ್ಟು 27,61,57,518 ರೂಪಾಯಿ (27 ಕೋಟಿ 61 ಲಕ್ಷ ರೂ.) ಜಮೆಯಾಗಿದೆ. ಈ ಹಣವನ್ನು ಮಠದ ಅಭಿವೃದ್ಧಿ, ದಾಸೋಹ ನಿಧಿ ಮತ್ತು ಸಮಾಜದ ವಿವಿಧ ಸೇವಾ ಕಾರ್ಯಗಳಿಗೆ ಬಳಸಿಕೊಳ್ಳಲಾಗಿದೆ ಎಂದು ಅವರು ತಿಳಿಸಿದ್ದಾರೆ.

ಏನಿದು ಲೆಕ್ಕದ ವಿವಾದ?

ಸಮಾಜದ ಕೆಲವು ಮುಖಂಡರು ಮಠದ ಲೆಕ್ಕಪತ್ರಗಳಲ್ಲಿ ಪಾರದರ್ಶಕತೆ ಇಲ್ಲ ಎಂದು ಆರೋಪಿಸಿ “ಲೆಕ್ಕ ಕೊಡಿ” ಚಳವಳಿ ಆರಂಭಿಸಿದ್ದರು. ಈ ಬಗ್ಗೆ ಪ್ರತಿಕ್ರಿಯಿಸಿದ ಟ್ರಸ್ಟ್ ಸದಸ್ಯರು, “ನಮ್ಮದು ಚಾರಿಟಬಲ್ ಟ್ರಸ್ಟ್ ಆಗಿದ್ದು, ಪ್ರತಿ ವರ್ಷ ಸರ್ಕಾರಕ್ಕೆ ಲೆಕ್ಕ ಸಲ್ಲಿಸುತ್ತಿದ್ದೇವೆ. ಪ್ರತಿ ತಿಂಗಳು ಟ್ರಸ್ಟ್ ಮೀಟಿಂಗ್‌ನಲ್ಲಿ ಲೆಕ್ಕ ಮಂಡಿಸಲಾಗುತ್ತದೆ. ಆದರೆ ಸಾರ್ವಜನಿಕವಾಗಿ ಲೆಕ್ಕ ಕೊಡುವ ಪದ್ಧತಿ ಇಲ್ಲದಿದ್ದರೂ, ಸಮಾಜದ ಹಿತದೃಷ್ಟಿಯಿಂದ ಈಗ ಎಲ್ಲವನ್ನೂ ಬಹಿರಂಗಪಡಿಸಿದ್ದೇವೆ” ಎಂದಿದ್ದಾರೆ.

Read Also: ಹರಿಹರ ಪಂಚಮಸಾಲಿ ಪೀಠದಲ್ಲಿ ಹೈಡ್ರಾಮಾ: ಲೆಕ್ಕಪತ್ರ ಮಂಡನೆಗೆ ಭಕ್ತರ ತೀವ್ರ ವಿರೋಧ, ಸಭೆಯಲ್ಲಿ ಗೊಂದಲ!

ಐದು ಗಂಟೆಗಳ ಕಾಲ ನಡೆದ ಸುದೀರ್ಘ ಸಭೆ

ದಿನಾಂಕ 11-04-2026 ರಂದು ಹರಿಹರ ಮಠದಲ್ಲಿ ಸಮಾಜದ ಗಣ್ಯರ ಸಮ್ಮುಖದಲ್ಲಿ ವಿಶೇಷ ಸಭೆ ನಡೆಯಿತು. ಈ ಸಭೆಯಲ್ಲಿ ಪ್ರಮುಖರಾದ ನಾಗನಗೌಡರು, ಪರಮೇಶ್ವರ ಗೌಡರು ಹಾಗೂ ಹಿರಿಯ ವಕೀಲರ ತಂಡದ ಮುಂದೆ ಲೆಕ್ಕದ ಪುಸ್ತಕಗಳನ್ನು ಇಡಲಾಗಿತ್ತು. ಸಂಜೆ 5 ಗಂಟೆಯಿಂದ ರಾತ್ರಿ 10 ಗಂಟೆಯವರೆಗೂ ನಡೆದ ಈ ಸುದೀರ್ಘ ಚರ್ಚೆಯಲ್ಲಿ ಪ್ರತಿಯೊಂದು ಪೈಸೆಗೂ ಸೂಕ್ತ ದಾಖಲೆಗಳನ್ನು ಒದಗಿಸಲಾಗಿದೆ ಎಂದು ಮಂಡಳಿ ಸ್ಪಷ್ಟಪಡಿಸಿದೆ.

“ಸ್ವಾಮೀಜಿಯವರು ಸಮಾಜಕ್ಕೆ ಮಾಡುತ್ತಿರುವ ಕೆಲಸಗಳನ್ನು ಸಹಿಸದ ಕೆಲವರು, ಸಾರ್ವಜನಿಕರ ಗಮನ ಬೇರೆಡೆ ಸೆಳೆಯಲು ಈ ರೀತಿ ಲೆಕ್ಕದ ವಿವಾದ ಸೃಷ್ಟಿಸುತ್ತಿದ್ದಾರೆ. ಆದರೆ ಸತ್ಯ ಯಾವತ್ತೂ ಮರೆಯಾಗುವುದಿಲ್ಲ” ಎಂದು ಪೀಠದ ಆಡಳಿತ ಮಂಡಳಿ ಆಕ್ರೋಶ ವ್ಯಕ್ತಪಡಿಸಿದೆ.