ದಾವಣಗೆರೆಯ ಸಂಶೋಧಕನ ಕಮಾಲ್: ಪಶ್ಚಿಮ ಘಟ್ಟಗಳಲ್ಲಿ ಮೂರು ಹೊಸ ಪ್ರಭೇದದ ಅಣಬೆಗಳ ಪತ್ತೆ!

ದಾವಣಗೆರೆ: ಕರ್ನಾಟಕದ ಜೀವವೈವಿಧ್ಯದ ಗಣಿಯಾದ ಪಶ್ಚಿಮ ಘಟ್ಟಗಳಲ್ಲಿ ದಾವಣಗೆರೆ ಮೂಲದ ಯುವ ಸಂಶೋಧಕರೊಬ್ಬರು ಜಗತ್ತಿಗೆ ಇದುವರೆಗೆ ಪರಿಚಯವಿಲ್ಲದ ಮೂರು ಹೊಸ ಶಿಲೀಂಧ್ರ (ಅಣಬೆ) ತಳಿಗಳನ್ನು ಪತ್ತೆ ಹಚ್ಚುವ ಮೂಲಕ ವಿಜ್ಞಾನ ಲೋಕದಲ್ಲಿ ಹೊಸ ಸಂಚಲನ ಮೂಡಿಸಿದ್ದಾರೆ.

ಬೆಂಗಳೂರಿನ ಸೆಂಟ್ ಜೋಸೆಫ್ ವಿಶ್ವವಿದ್ಯಾಲಯದ ಸಂಶೋಧಕ ಎಸ್. ಭರತ್ ಕುಮಾರ್ ಈ ಅಪರೂಪದ ಸಾಧನೆ ಮಾಡಿದವರು. ಶಿವಮೊಗ್ಗ ಮತ್ತು ಚಿಕ್ಕಮಗಳೂರು ಜಿಲ್ಲೆಗಳ ದಟ್ಟ ಅರಣ್ಯ ಪ್ರದೇಶದಲ್ಲಿ ಕಳೆದ ಮೂರು ವರ್ಷಗಳಿಂದ ಇವರು ನಡೆಸಿದ ನಿರಂತರ ಸಂಶೋಧನೆಗೆ ಈಗ ಅಂತರಾಷ್ಟ್ರೀಯ ಮಾನ್ಯತೆ ದೊರೆತಿದೆ.

ಹೊಸ ತಳಿಗಳ ವಿಶೇಷತೆ ಏನು?

ಭರತ್ ಕುಮಾರ್ ಅವರು ಪತ್ತೆಹಚ್ಚಿದ ಏಳು ತಳಿಗಳಲ್ಲಿ ಮೂರು ತಳಿಗಳನ್ನು ಅಂತರಾಷ್ಟ್ರೀಯ ಜರ್ನಲ್‌ಗಳಲ್ಲಿ ಅಧಿಕೃತವಾಗಿ ಪ್ರಕಟಿಸಲಾಗಿದೆ. ಈ ಅಣಬೆಗಳು ಮರಗಳ ಸವೆತಕ್ಕೆ ಮತ್ತು ಕಾಡಿನ ಪರಿಸರ ವ್ಯವಸ್ಥೆಗೆ ಹೇಗೆ ಕಾರಣವಾಗುತ್ತವೆ ಎಂಬ ಬಗ್ಗೆ ಇವರು ಅಧ್ಯಯನ ನಡೆಸಿದ್ದಾರೆ.

Read Also: ರೈತರ ಗಮನಕ್ಕೆ: ಬೆಂಬಲ ಬೆಲೆಯಲ್ಲಿ ರಾಗಿ ಮಾರಾಟಕ್ಕೆ ಮೇ 5 ಅಂತಿಮ ಗಡುವು

ಪತ್ತೆಯಾದ ಪ್ರಮುಖ ತಳಿಗಳು:

ಗ್ಯಾನೋಡರ್ಮಾ ಸ್ವಿಟೇನಿಯಂ (Ganoderma swietenium): ಇದು ಪ್ರಸಿದ್ಧ ಮಹಾಗೋನಿ ಮರಗಳಲ್ಲಿ ಕಂಡುಬರುವ ವಿಶಿಷ್ಟ ಶಿಲೀಂಧ್ರವಾಗಿದೆ.

ಫಲ್ವಿಫೋನ್ಸ್ ಫಿಸಿಕೋಲ (Fulvifomes physiciola): ಈ ತಳಿಯು ಆಲದ ಮರದ ಬಡ್ಡೆಯಲ್ಲಿ ಬೆಳೆಯುವುದು ವಿಶೇಷ.

ಲ್ಯಾಕ್ನೋಕ್ಲೇಡಿಯಂ ಸೇವ ಕೃಷ್ಣರಂ (Lachnocladium seviyakrishnanum): ಸಂಶೋಧಕರು ಈ ವಿಶೇಷ ತಳಿಗೆ ತಮ್ಮ ತಂದೆಯ ಸ್ಮರಣಾರ್ಥವಾಗಿ ಅವರ ಹೆಸರನ್ನೇ ಇಟ್ಟಿದ್ದಾರೆ.

ಸಂಶೋಧನೆಯ ಹಾದಿ ಮತ್ತು ಗೌರವ

ಕ್ಷೇತ್ರ ಕಾರ್ಯದ ಸಮಯದಲ್ಲಿ ಜಿಪಿಎಸ್ ಮತ್ತು ಡಿಎನ್ಎ ಫಿಂಗರ್ ಪ್ರಿಂಟಿಂಗ್ ತಂತ್ರಜ್ಞಾನವನ್ನು ಬಳಸಿ ಈ ಶಿಲೀಂಧ್ರಗಳ ಮಾಹಿತಿಯನ್ನು ವಿಶ್ವಮಟ್ಟದ ‘ಜೆನ್ ಬ್ಯಾಂಕ್’ನಲ್ಲಿ ದಾಖಲಿಸಲಾಗಿದೆ. ಭರತ್ ಕುಮಾರ್ ಅವರ ಈ ಶೈಕ್ಷಣಿಕ ಸಾಧನೆಯನ್ನು ಗುರುತಿಸಿ ಮೈಸೂರು ವಿಶ್ವವಿದ್ಯಾಲಯವು ಇತ್ತೀಚೆಗೆ “ಯುವ ಸಂಶೋಧನಾ ವಿದ್ವಾಂಸ ಪ್ರಶಸ್ತಿ 2025” ನೀಡಿ ಗೌರವಿಸಿದೆ.

ಕೇವಲ ಮೂರು ವರ್ಷಗಳ ಕಡಿಮೆ ಅವಧಿಯಲ್ಲಿ 10ಕ್ಕೂ ಹೆಚ್ಚು ಸಂಶೋಧನಾ ಪ್ರಬಂಧಗಳನ್ನು ಮಂಡಿಸಿರುವ ಭರತ್ ಕುಮಾರ್, ಸೆಂಟ್ ಜೋಸೆಫ್ ವಿಶ್ವವಿದ್ಯಾಲಯದಿಂದ ಪಿಹೆಚ್‌ಡಿ ಪೂರೈಸುತ್ತಿರುವ ಮೊದಲ ಸಂಶೋಧಕರಾಗಿದ್ದಾರೆ. “ನಮ್ಮ ಪಶ್ಚಿಮ ಘಟ್ಟಗಳ ಅಣಬೆಗಳ ಬಗ್ಗೆ ಜಗತ್ತಿಗೆ ಹೆಚ್ಚಿನ ಮಾಹಿತಿ ಇರಲಿಲ್ಲ, ಈ ಸಂಶೋಧನೆಯು ಅರಣ್ಯ ಸಂರಕ್ಷಣೆಗೆ ಸಹಕಾರಿಯಾಗಲಿದೆ” ಎಂದು ಅವರು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.