ಪುಸ್ತಕ ಸುಟ್ಟ ತಂದೆ, ಕಣ್ಣೀರು ಹಾಕಿದ ಮಗಳು! 112ಗೆ ಒಂದೇ ಒಂದು ಕರೆ.. ನ್ಯಾಮತಿ ಪೊಲೀಸರು ಮಾಡಿದ್ದೇನು ಗೊತ್ತಾ?

ದಾವಣಗೆರೆ: “ಅಪ್ಪ ಕುಡಿದು ಬಂದು ಗಲಾಟೆ ಮಾಡ್ತಾನೆ, ಶಾಲೆಗೆ ಹೋಗ್ಬೇಡ ಅಂತ ಪುಸ್ತಕಗಳನ್ನೆಲ್ಲಾ ಸುಟ್ಟು ಹಾಕಿದ್ದಾನೆ ಸರ್…” ಎಂದು ಅಳುತ್ತಲೇ 112 ಗೆ ಕರೆ ಮಾಡಿದ ಬಾಲಕಿಯ ಸಂಕಷ್ಟಕ್ಕೆ ನ್ಯಾಮತಿ ಪೊಲೀಸರು ಮಿಂಚಿನ ವೇಗದಲ್ಲಿ ಸ್ಪಂದಿಸಿ ಮಾನವೀಯತೆ ಮೆರೆದಿದ್ದಾರೆ.

ದಾವಣಗೆರೆ ಜಿಲ್ಲೆಯ ನ್ಯಾಮತಿ ತಾಲ್ಲೂಕಿನ ಆರುಂಡಿ ಗ್ರಾಮದಲ್ಲಿ ಮನಕಲಕುವ ಘಟನೆ ನಡೆದಿದೆ. 10ನೇ ತರಗತಿ ಓದುತ್ತಿರುವ ವಿದ್ಯಾರ್ಥಿನಿಯ ತಂದೆ ನಿತ್ಯ ಕುಡಿದು ಬಂದು ಮನೆಯಲ್ಲಿ ದಾಂಧಲೆ ನಡೆಸುತ್ತಿದ್ದ ಎನ್ನಲಾಗಿದೆ. ಈ ಬಾರಿಯೂ ಕುಡಿದ ಮತ್ತಿನಲ್ಲಿ ಮಗಳು ಶಾಲೆಗೆ ಹೋಗದಂತೆ ತಡೆಯಲು ಆಕೆಯ ಪಠ್ಯಪುಸ್ತಕ ಹಾಗೂ ನೋಟ್‌ಬುಕ್‌ಗಳನ್ನೆಲ್ಲ ಸುಟ್ಟು ಹಾಕಿದ್ದ.

ಇದರಿಂದ ಕಂಗಾಲಾದ ಬಾಲಕಿ, ತನ್ನ ವಿದ್ಯಾಭ್ಯಾಸದ ಬಗ್ಗೆ ಚಿಂತೆಗೀಡಾಗಿ ನೇರವಾಗಿ 112 ತುರ್ತು ಸಹಾಯವಾಣಿಗೆ ಕರೆ ಮಾಡಿ ದೂರು ನೀಡಿದ್ದಾಳೆ.

Read Also: ಹರಿಹರ ಪಂಚಮಸಾಲಿ ಪೀಠದಲ್ಲಿ ಸಮರ: ಕೂಡಲಸಂಗಮದ ಲೆಕ್ಕ ಕೇಳಿದ ಎಚ್.ಎಸ್. ನಾಗರಾಜ್!

ಪೊಲೀಸರೇ ಪೋಷಕರಾದರು: ವಿಷಯ ತಿಳಿದ ತಕ್ಷಣ ಸ್ಥಳಕ್ಕೆ ದೌಡಾಯಿಸಿದ 112 ವಾಹನದ ಸಿಬ್ಬಂದಿಗಳಾದ ಹೇಮರಾಜ್ ಮತ್ತು ರವಿಕುಮಾರ್, ಬಾಲಕಿಗೆ ಧೈರ್ಯ ತುಂಬಿ, ಆಕೆಗೆ ತಕ್ಷಣಕ್ಕೆ ಅಗತ್ಯವಿದ್ದ ಪುಸ್ತಕ ಮತ್ತು ನೋಟ್‌ಬುಕ್‌ಗಳನ್ನು ಕೊಡಿಸಿದ್ದಾರೆ.

ಪಿಐ ರವಿ ಸಾಥ್: ಈ ವಿಷಯ ನ್ಯಾಮತಿ ಪೊಲೀಸ್ ಠಾಣೆಯ ಪಿಐ ರವಿ ಅವರ ಗಮನಕ್ಕೆ ಬಂದಿದ್ದು, ಅವರು ಕೂಡಲೇ ಬಾಲಕಿಗೆ ಪರೀಕ್ಷೆಗೆ ಬೇಕಾದ ಹೆಚ್ಚಿನ ಪುಸ್ತಕಗಳನ್ನು ಒದಗಿಸಿ ಪ್ರೋತ್ಸಾಹಿಸಿದ್ದಾರೆ. ಅಷ್ಟೇ ಅಲ್ಲ, ಶಾಲಾ ಶಿಕ್ಷಕರೊಂದಿಗೆ ಖುದ್ದು ಮಾತನಾಡಿ, ಆಕೆಯ ಮುಂದಿನ ವಿದ್ಯಾಭ್ಯಾಸಕ್ಕೆ ಯಾವುದೇ ತೊಂದರೆಯಾಗದಂತೆ ನೋಡಿಕೊಳ್ಳಲು ಸೂಚಿಸಿದ್ದಾರೆ.

ಕುಡುಕ ತಂದೆ ಮಗಳ ಭವಿಷ್ಯ ಸುಡಲು ನೋಡಿದರೆ, ಪೊಲೀಸರು ಆಕೆಯ ಬೆನ್ನಿಗೆ ನಿಂತು ಭವಿಷ್ಯ ರೂಪಿಸಲು ಸಹಾಯ ಮಾಡಿರುವುದು ಸಾರ್ವಜನಿಕರ ಮೆಚ್ಚುಗೆಗೆ ಪಾತ್ರವಾಗಿದೆ.