ಹೊಳಲ್ಕೆರೆಯಲ್ಲಿ ಸಿದ್ದರಾಮೇಶ್ವರ ಜಯಂತಿ ಸಂಭ್ರಮ: ಲಕ್ಷಾಂತರ ಭಕ್ತರ ಸಮಾಗಮ, ನಾಳೆ ಸಿಎಂ ಭೇಟಿ

ಹೊಳಲ್ಕೆರೆ: ಕೆರೆಗಳ ನಿರ್ಮಾಣದ ಮೂಲಕ ‘ಕಾಯಕಯೋಗಿ’ ಎಂದೇ ಪ್ರಸಿದ್ಧರಾದ ಶ್ರೀಗುರು ಸಿದ್ದರಾಮೇಶ್ವರರ 853ನೇ ಜಯಂತಿ ಮಹೋತ್ಸವವು ಅರೆ ಮಲೆನಾಡು ಹೊಳಲ್ಕೆರೆ ಪಟ್ಟಣದ ವಾಲ್ಮೀಕಿ ಮೈದಾನದಲ್ಲಿ (ಜಿ. ಬಸಪ್ಪ ಮಹಾಮಂಟಪ) ಇಂದು ಅತ್ಯಂತ ವೈಭವದಿಂದ ಆರಂಭವಾಯಿತು. ರಾಜ್ಯದ ವಿವಿಧ ಮೂಲೆಗಳಿಂದ ಲಕ್ಷಾಂತರ ಭಕ್ತರು ಪಟ್ಟಣಕ್ಕೆ ಆಗಮಿಸುತ್ತಿದ್ದು, ಇಡೀ ಹೊಳಲ್ಕೆರೆ ಕೇಸರಿ ಮಯವಾಗಿದೆ.

ಧ್ವಜಾರೋಹಣ ಮತ್ತು ಭವ್ಯ ಮೆರವಣಿಗೆ

ಇಂದು ಬೆಳಿಗ್ಗೆ 7:30ಕ್ಕೆ ಕುಪ್ಪೂರು ತಮ್ಮಡಿಹಳ್ಳಿ ವಿರಕ್ತಮಠದ ಡಾ. ಅಭಿನವ ಮಲ್ಲಿಕಾರ್ಜುನ ದೇಶಿಕೇಂದ್ರ ಸ್ವಾಮೀಜಿ ಅವರು ಷಟಸ್ಥಲ ಧ್ವಜಾರೋಹಣ ನೆರವೇರಿಸುವ ಮೂಲಕ ಕಾರ್ಯಕ್ರಮಕ್ಕೆ ಚಾಲನೆ ನೀಡಿದರು. ನೊಳಂಬ ಲಿಂಗಾಯತ ಸಂಘದ ರಾಜ್ಯಾಧ್ಯಕ್ಷ ಬಿ.ಕೆ. ಚಂದ್ರಶೇಖರ್ ನಂದಿ ಧ್ವಜಾರೋಹಣ ನೆರವೇರಿಸಿದರು.

ಬಳಿಕ ನಡೆದ ಅದ್ದೂರಿ ಮೆರವಣಿಗೆಯಲ್ಲಿ 1108 ಮಹಿಳೆಯರ ಪೂರ್ಣಕುಂಭ, ನಂದಿಧ್ವಜ, ವೀರಗಾಸೆ ಮತ್ತು ಡೊಳ್ಳುಕುಣಿತದಂತಹ ಜಾನಪದ ಕಲಾತಂಡಗಳು ಸಿದ್ದರಾಮೇಶ್ವರರ ಭಾವಚಿತ್ರದೊಂದಿಗೆ ಸಾಗಿದ್ದು ನೋಡುಗರ ಕಣ್ಮನ ಸೆಳೆಯಿತು.

Read Also: ಚಿತ್ರದುರ್ಗ: ಭದ್ರಾ ಮೇಲ್ದಂಡೆ ಯೋಜನೆಗಾಗಿ ಉಪವಾಸ ಸತ್ಯಾಗ್ರಹ; ಅಸ್ವಸ್ಥರಾದ್ರೂ ಹೋರಾಟ ಕೈಬಿಡದ ರೈತ ನಾಯಕರು!

ಇಂದಿನ ಕಾರ್ಯಕ್ರಮದ ಮುಖ್ಯಾಂಶಗಳು

• ಉದ್ಘಾಟನೆ: ಬಿಜೆಪಿ ರಾಜ್ಯಾಧ್ಯಕ್ಷ ಬಿ.ವೈ. ವಿಜಯೇಂದ್ರ ಅವರು ಸಭಾ ಕಾರ್ಯಕ್ರಮವನ್ನು ಉದ್ಘಾಟಿಸುವರು.

• ಸ್ಮರಣ ಸಂಚಿಕೆ: ಕೇಂದ್ರ ಸಚಿವ ಎಚ್.ಡಿ. ಕುಮಾರಸ್ವಾಮಿ ಅವರು ಜಯಂತಿಯ ಸ್ಮರಣ ಸಂಚಿಕೆಯನ್ನು ಬಿಡುಗಡೆ ಮಾಡುವರು.

• ವಿಶೇಷ ಪ್ರಶಸ್ತಿ: ಇದೇ ಸಂದರ್ಭದಲ್ಲಿ ಹಿರಿಯ ಸಾಹಿತಿ ಕತ್ತಿಗೆ ಚನ್ನಪ್ಪ ಅವರಿಗೆ ‘ಸಿದ್ದರಾಮ ಸಾಹಿತ್ಯ ಪ್ರಶಸ್ತಿ’ ನೀಡಿ ಗೌರವಿಸಲಾಗುತ್ತದೆ.

• ಗಣ್ಯರು: ಮಾಜಿ ಸಚಿವ ಮಾಧುಸ್ವಾಮಿ, ಸಚಿವ ಈಶ್ವರ್ ಖಂಡ್ರೆ, ಶಾಸಕ ಡಾ. ಎಂ. ಚಂದ್ರಪ್ಪ ಸೇರಿದಂತೆ ಹಲವು ರಾಜಕೀಯ ಮುಖಂಡರು ಹಾಗೂ ಮಠಾಧೀಶರು ಉಪಸ್ಥಿತರಿರುವರು.

ನಾಳಿನ (ಜ. 15) ವಿಶೇಷ: ಮುಖ್ಯಮಂತ್ರಿಗಳ ಆಗಮನ

ಜಯಂತಿ ಮಹೋತ್ಸವದ ಎರಡನೇ ದಿನವಾದ ನಾಳೆ ಮಧ್ಯಾಹ್ನ 2:30ಕ್ಕೆ ನಡೆಯುವ ಸಮಾರೋಪ ಸಮಾರಂಭದಲ್ಲಿ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರು ಭಾಗವಹಿಸಲಿದ್ದಾರೆ. ಉಪ ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಅವರು ಕೃಷಿ ಮತ್ತು ಮಹಿಳಾ ಗೋಷ್ಠಿಯಲ್ಲಿ ಪಾಲ್ಗೊಳ್ಳುವ ನಿರೀಕ್ಷೆಯಿದೆ. ನಾಳೆ ಬೆಳಿಗ್ಗೆ ಮೈಸೂರಿನ ಡಾ. ಮಾತೆ ಬಸವಾಂಜಲಿ ಅವರ ನೇತೃತ್ವದಲ್ಲಿ ಬೃಹತ್ ಸಮೂಹ ಲಿಂಗಧಾರಣ ಕಾರ್ಯಕ್ರಮ ನಡೆಯಲಿದೆ.

ದಾಸೋಹದ ವೈಭವ

ಬಂದ ಭಕ್ತಾದಿಗಳಿಗೆ ಯಾವುದೇ ತೊಂದರೆಯಾಗದಂತೆ ಬೃಹತ್ ಮಂಟಪದಲ್ಲಿ ವ್ಯವಸ್ಥೆ ಮಾಡಲಾಗಿದೆ. ಗೋಧಿ ಪಾಯಸ, ಲಾಡು, ಅನ್ನ-ಸಾಂಬಾರ್ ಸೇರಿದಂತೆ ಭರ್ಜರಿ ದಾಸೋಹದ ವ್ಯವಸ್ಥೆ ಮಾಡಲಾಗಿದ್ದು, ಸುಮಾರು 5 ರಿಂದ 10 ಲಕ್ಷ ಜನರಿಗೆ ಊಟದ ಸಿದ್ಧತೆ ಮಾಡಿಕೊಳ್ಳಲಾಗಿದೆ.

ಸಂಕ್ಷಿಪ್ತ ವಿವರ:

• ಸ್ಥಳ: ವಾಲ್ಮೀಕಿ ಮೈದಾನ, ಶಿವಮೊಗ್ಗ ರಸ್ತೆ, ಹೊಳಲ್ಕೆರೆ.

• ದಿನಾಂಕ: ಜನವರಿ 14 ಮತ್ತು 15, 2026.

• ಆಯೋಜನೆ: ಶ್ರೀಗುರು ಸಿದ್ದರಾಮೇಶ್ವರ ಜಯಂತಿ ಮಹೋತ್ಸವ ಸಮಿತಿ.