ಹರಿಹರ ಪಂಚಮಸಾಲಿ ಪೀಠದಲ್ಲಿ ಹೈಡ್ರಾಮಾ: ಲೆಕ್ಕಪತ್ರ ಮಂಡನೆಗೆ ಭಕ್ತರ ತೀವ್ರ ವಿರೋಧ, ಸಭೆಯಲ್ಲಿ ಗೊಂದಲ!

ಹರಿಹರ (ದಾವಣಗೆರೆ): ಇಲ್ಲಿನ ವೀರಶೈವ ಲಿಂಗಾಯತ ಪಂಚಮಸಾಲಿ ಗುರುಪೀಠದಲ್ಲಿ ಶನಿವಾರ ನಡೆದ ಟ್ರಸ್ಟ್‌ನ ಮಹತ್ವದ ಸಭೆಯು ತೀವ್ರ ಗದ್ದಲ ಮತ್ತು ಸಂಘರ್ಷಕ್ಕೆ ಸಾಕ್ಷಿಯಾಯಿತು. ಶ್ರೀ ವಚನಾನಂದ ಸ್ವಾಮೀಜಿಗಳ ಪರವಾದ ಭಕ್ತರು ಲೆಕ್ಕಪತ್ರ ಮಂಡನೆಗೆ ಬಲವಾದ ವಿರೋಧ ವ್ಯಕ್ತಪಡಿಸಿದ್ದರಿಂದ ಸಭೆಯು ಅಸ್ತವ್ಯಸ್ತಗೊಂಡಿತು.

ನಡೆದಿದ್ದೇನು?

ಮಠದ ಆವರಣದಲ್ಲಿ ಟ್ರಸ್ಟ್‌ನ ವಾರ್ಷಿಕ ಲೆಕ್ಕಪತ್ರಗಳನ್ನು ಮಂಡಿಸಲು ಸಭೆ ಕರೆಯಲಾಗಿತ್ತು. ಸಭೆ ಆರಂಭವಾದ ಕೆಲವೇ ನಿಮಿಷಗಳಲ್ಲಿ ಭಕ್ತರ ಒಂದು ಗುಂಪು ಲೆಕ್ಕಪತ್ರ ಸಲ್ಲಿಕೆಯನ್ನು ಪ್ರಶ್ನಿಸಿ ಬಹಿಷ್ಕಾರ ಹಾಕಿತು. ಈ ವೇಳೆ ಪರಿಸ್ಥಿತಿ ಕೈಮೀರಿ ಹೋಯಿತು.

ವೇದಿಕೆಗೆ ನುಗ್ಗಲು ಯತ್ನ:

ಟ್ರಸ್ಟ್ ಸದಸ್ಯರಾದ ಎಚ್.ಎಸ್. ನಾಗರಾಜ್ ಅವರು ಭಾಷಣ ಮಾಡಲು ಮುಂದಾದಾಗ, ಸ್ವಾಮೀಜಿ ಪರವಾದ ಭಕ್ತರು ವೇದಿಕೆಯತ್ತ ಧಾವಿಸಿ ಅಡ್ಡಿಪಡಿಸಿದರು. ಈ ಸಂದರ್ಭದಲ್ಲಿ ಟ್ರಸ್ಟ್ ಪರ ಹಾಗೂ ವಿರುದ್ಧ ಬಣಗಳ ನಡುವೆ ಮಾತಿನ ಚಕಮಕಿ ನಡೆದು ಕೋಲಾಹಲ ಸೃಷ್ಟಿಯಾಯಿತು. ಘೋಷಣೆಗಳ ಅಬ್ಬರದಿಂದ ಮಠದ ಆವರಣ ರಣರಂಗದಂತಾಗಿತ್ತು.

Read Also: ಪಂಚಮಸಾಲಿ ಪೀಠದಲ್ಲಿ ‘ವಚನ’ ಯುದ್ಧ: ನಾನಲ್ಲ, ಭ್ರಷ್ಟ ಟ್ರಸ್ಟಿಗಳೇ ಮೊದಲು ಮಠ ಬಿಡಲಿ – ವಚನಾನಂದ ಶ್ರೀ!

ಪೊಲೀಸರ ಬಿಗಿ ಬಂದೋಬಸ್ತ್:

ಘಟನೆಯ ಬಗ್ಗೆ ಮಾಹಿತಿ ತಿಳಿಯುತ್ತಿದ್ದಂತೆ ಸ್ಥಳಕ್ಕೆ ಧಾವಿಸಿದ ಪೊಲೀಸರು, ವೇದಿಕೆಗೆ ನುಗ್ಗಲು ಯತ್ನಿಸಿದ ಭಕ್ತರನ್ನು ತಡೆದು ಪರಿಸ್ಥಿತಿ ನಿಯಂತ್ರಿಸಿದರು. ಗೊಂದಲ ಸೃಷ್ಟಿಸಿದವರನ್ನು ದೇಗುಲದ ಆವರಣದಿಂದ ಹೊರಗೆ ಕಳುಹಿಸಿ ಶಾಂತಿ ಕಾಪಾಡುವ ಪ್ರಯತ್ನ ಮಾಡಿದರು.

ಗದ್ದಲದ ನಡುವೆಯೇ ಲೆಕ್ಕಪತ್ರ ಮಂಡನೆ:

ಬಾಹ್ಯ ಪ್ರತಿಭಟನೆ ಮತ್ತು ವಿರೋಧದ ನಡುವೆಯೂ ಟ್ರಸ್ಟ್‌ನ ಪ್ರಧಾನ ಧರ್ಮದರ್ಶಿ ಬಿ.ಸಿ. ಉಮಾಪತಿ ಅವರು ಮಠದ ಲೆಕ್ಕಪತ್ರಗಳನ್ನು ಸಭೆಯ ಮುಂದೆ ಮಂಡಿಸಿದರು. ಸಮಸ್ತ ಭಕ್ತರ ಸಮ್ಮುಖದಲ್ಲಿ ಪಾರದರ್ಶಕವಾಗಿ ಆಡಳಿತ ನಡೆಯಬೇಕು ಎಂಬುದು ಟ್ರಸ್ಟ್ ಸದಸ್ಯರ ವಾದವಾಗಿತ್ತು.