ಚಿತ್ರದುರ್ಗ: ಹಿರಿಯ ಸಾಹಿತ್ಯ ರತ್ನ, ಖ್ಯಾತ ಪತ್ರಕರ್ತ ಜಿ.ಎಸ್. ಉಜ್ಜಿನಪ್ಪ ಇನ್ನಿಲ್ಲ

ಚಿತ್ರದುರ್ಗ: ಕೋಟೆನಾಡು ಚಿತ್ರದುರ್ಗದ ಹೆಮ್ಮೆಯ ಸಾಹಿತಿ ಹಾಗೂ ದಶಕಗಳ ಕಾಲ ಪತ್ರಿಕೋದ್ಯಮದಲ್ಲಿ ಮೌಲ್ಯಯುತ ಸೇವೆ ಸಲ್ಲಿಸಿದ್ದ ಹಿರಿಯ ಪತ್ರಕರ್ತ ಜಿ.ಎಸ್. ಉಜ್ಜಿನಪ್ಪ (87) ಅವರು ಶನಿವಾರ (ಜೂನ್ 20, 2026) ಬೆಳಿಗ್ಗೆ ನಗರದ ಸರಸ್ವತಿಪುರಂ ನಿವಾಸದಲ್ಲಿ ನಿಧನರಾಗಿದ್ದಾರೆ.

ಮೃತರು ಓರ್ವ ಪುತ್ರ, ಓರ್ವ ಪುತ್ರಿ ಸೇರಿದಂತೆ ಅಪಾರ ಬಂಧು-ಬಳಗ ಹಾಗೂ ಅಭಿಮಾನಿಗಳನ್ನು ಅಗಲಿದ್ದಾರೆ. ಹಿರಿಯ ಚೇತನದ ಅಂತ್ಯಕ್ರಿಯೆಯು ಜೂನ್ 21ರ ಭಾನುವಾರ ಬೆಳಿಗ್ಗೆ 10 ಗಂಟೆಯ ನಂತರ ಹಿರಿಯೂರು ತಾಲ್ಲೂಕಿನ ಗೌನಹಳ್ಳಿಯಲ್ಲಿ ನೆರವೇರಲಿದೆ ಎಂದು ಕುಟುಂಬದ ಮೂಲಗಳು ತಿಳಿಸಿವೆ. ಉಜ್ಜಿನಪ್ಪನವರ ಅಗಲಿಕೆಗೆ ಚಿತ್ರದುರ್ಗದ ಸಾಹಿತ್ಯ, ಸಂಸ್ಕೃತಿ ಹಾಗೂ ಪತ್ರಿಕಾ ವಲಯ ತೀವ್ರ ಸಂತಾಪ ಸೂಚಿಸಿದೆ.

ಗೌನಹಳ್ಳಿಯಿಂದ ಆರಂಭವಾದ ಸಾಧನೆಯ ಪಯಣ

ಜಿ.ಎಸ್. ಉಜ್ಜಿನಪ್ಪ ಅವರು 1939ರ ಅಕ್ಟೋಬರ್ 30ರಂದು ಹಿರಿಯೂರು ತಾಲ್ಲೂಕಿನ ಗೌನಹಳ್ಳಿಯಲ್ಲಿ ಗೊಂಚಿಗಾರ ಸಿದ್ದಯ್ಯ ಮತ್ತು ಲಿಂಗಮ್ಮ ದಂಪತಿಯ ಹಿರಿಯ ಮಗನಾಗಿ ಜನಿಸಿದರು. ಮೈಸೂರು ವಿಶ್ವವಿದ್ಯಾಲಯದಿಂದ ಬಿ.ಎ ಪದವಿ (1962) ಹಾಗೂ ಬೆಂಗಳೂರಿನ ನ್ಯಾಷನಲ್ ಇನ್ಸ್ಟಿಟ್ಯೂಟ್ ಆಫ್ ಸೋಷಿಯಲ್ ಸೈನ್ಸ್‌ನಿಂದ ಡಿಎಸ್ಎಸ್‌ಎಪಿ ಸ್ನಾತಕೋತ್ತರ ಡಿಪ್ಲೋಮಾ (1965) ಶಿಕ್ಷಣ ಪಡೆದಿದ್ದರು. 1969ರಲ್ಲಿ ಶ್ರೀಮತಿ ಭೈರಮ್ಮ ಅವರೊಂದಿಗೆ ವಿವಾಹ ಬಂಧನಕ್ಕೆ ಒಳಗಾಗಿದ್ದರು.

Read Also: ಚಿತ್ರದುರ್ಗದ ರೈತರಿಗೆ ಸುವರ್ಣಾವಕಾಶ: ಜೂನ್ 22 ರಿಂದ ಜೇನು ಕೃಷಿ, ಸಾವಯವ ಕೃಷಿ ಹಾಗೂ ಔಷಧೀಯ ಸಸ್ಯಗಳ ಉಚಿತ ತರಬೇತಿ!

ಶಿಕ್ಷಕ ವೃತ್ತಿಯಿಂದ ಪತ್ರಿಕೋದ್ಯಮದ ಉತ್ತುಂಗಕ್ಕೆ

ಆರಂಭದಲ್ಲಿ ಮಧುಗಿರಿ ತಾಲ್ಲೂಕಿನ ದಂಡಿನದಿಬ್ಬ ಹಾಗೂ ಬೆಂಗಳೂರಿನ ಆರ್ಯ ವಿದ್ಯಾಶಾಲಾದಲ್ಲಿ ಶಿಕ್ಷಕರಾಗಿ ಸೇವೆ ಸಲ್ಲಿಸಿದ ಅವರು, ನಂತರ ಗುಲ್ಬರ್ಗಾದ ಎಂ.ಎಸ್.ಕೆ ಹತ್ತಿಗಿರಣಿಯಲ್ಲಿ ಸಿಬ್ಬಂದಿ ಅಧಿಕಾರಿಯಾಗಿ ಕೆಲಸ ಮಾಡಿದರು. ಇದೇ ಅವಧಿಯಲ್ಲಿ ‘ನವಕಲ್ಯಾಣ’ ವಾರಪತ್ರಿಕೆಯ ಮೂಲಕ ಪತ್ರಿಕೋದ್ಯಮ ಪ್ರವೇಶಿಸಿದರು.

ಬಳಿಕ ಚಿತ್ರದುರ್ಗದ ಎಸ್.ಜೆ.ಎಂ ಬೃಹನ್ಮಠ ಪ್ರೌಢಶಾಲೆಯಲ್ಲಿ ಅಧ್ಯಾಪಕರಾಗಿ ಮತ್ತು ಮಠದ ‘ಗುರುಕುಲ’ ತ್ರೈಮಾಸಿಕದ ಸಂಪಾದಕರಾಗಿ ಕಾರ್ಯನಿರ್ವಹಿಸಿದರು. ಮುಂದೆ ಜಯಲಕ್ಷ್ಮಿ ಹತ್ತಿಗಿರಣಿಯಲ್ಲಿ 20 ವರ್ಷಗಳ ಸುದೀರ್ಘ ಸೇವೆ ಸಲ್ಲಿಸಿದರು.

ಪತ್ರಿಕೋದ್ಯಮದ ಮೈಲಿಗಲ್ಲು:

• 1974 ರಲ್ಲಿ ‘ಲೋಕವಾಣಿ’ ಪತ್ರಿಕೆಯ ಹವ್ಯಾಸಿ ವರದಿಗಾರರಾಗಿ ಕಾರ್ಯ ಆರಂಭ.

• 1984 ರಿಂದ 2013 ರವರೆಗೆ ಸತತ 29 ವರ್ಷಗಳ ಕಾಲ ಪ್ರತಿಷ್ಠಿತ ‘ಟೈಮ್ಸ್ ಆಫ್ ಇಂಡಿಯಾ’ ಪತ್ರಿಕೆಯ ಚಿತ್ರದುರ್ಗ ಜಿಲ್ಲಾ ಖಾಯಂ ವರದಿಗಾರರಾಗಿ ದಿಟ್ಟ ಪತ್ರಿಕೋದ್ಯಮ ನಡೆಸಿದರು.

60ರ ಹರೆಯದಲ್ಲಿ ಅರಳಿದ ಸಾಹಿತ್ಯ ಪ್ರತಿಭೆ

ವಯಸ್ಸು ಕೇವಲ ಸಂಖ್ಯೆಯಷ್ಟೇ ಎಂಬುದನ್ನು ನಿರೂಪಿಸಿದ ಉಜ್ಜಿನಪ್ಪನವರು, ತಮ್ಮ 60ನೇ ವಯಸ್ಸಿನ ನಂತರ ಸಾಹಿತ್ಯ ಕೃಷಿ ಆರಂಭಿಸಿ 15ಕ್ಕೂ ಹೆಚ್ಚು ಮಹತ್ವದ ಕೃತಿಗಳನ್ನು ರಚಿಸಿದರು.

• ಪ್ರಮುಖ ಕೃತಿಗಳು: ‘ಗೌನಳ್ಳೇರು’ (ಗ್ರಾಮಭಾರತ ಕಥನ), ‘ಬದುಕೆಂಬ ಮಹಾಪ್ರಬಂಧ’ (ಆತ್ಮಕಥೆ), ‘ದಾರಿಗೆ ಜತೆಯಲ್ಲಿ’ (ಕಥಾ ಸಂಕಲನ).

• ಸರ್ಕಾರಿ ಕೊಡುಗೆ: ಕರ್ನಾಟಕ ಸರ್ಕಾರಕ್ಕಾಗಿ ‘ಹಿರಿಯೂರು ತಾಲ್ಲೂಕು ಗೆಜೆಟಿಯರ್’ (2017) ಸಿದ್ಧಪಡಿಸಿಕೊಟ್ಟಿದ್ದರು.

• ಅನುವಾದ: ಡಾ. ಮೀರಸಾಬಿಹಳ್ಳಿ ಶಿವಣ್ಣನವರ ‘ಕನ್ನಡ ಎತ್ತಪ್ಪ’ ಕೃತಿಯನ್ನು ಇಂಗ್ಲಿಷ್‌ಗೆ ಅನುವಾದಿಸಿದ್ದರು.

ಅರಸಿ ಬಂದ ಪ್ರಶಸ್ತಿಗಳು

ಇವರ ಅನುಪಮ ಸೇವೆಯನ್ನು ಗುರುತಿಸಿ ಅಖಿಲ ಭಾರತ ಕನ್ನಡ ಸಾಹಿತ್ಯ ಸಮ್ಮೇಳನ ಪ್ರಶಸ್ತಿ, ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ, ಪತ್ರಕರ್ತರ ಸಮ್ಮೇಳನ ಪ್ರಶಸ್ತಿ, ಶರಣ ಸಾಹಿತ್ಯ ಪರಿಷತ್ತು ಪ್ರಶಸ್ತಿ ಹಾಗೂ ಡಾ. ಮೀರಸಾಬೀಹಳ್ಳಿ ಶಿವಣ್ಣ ಸಾಹಿತ್ಯಶ್ರೀ ಪ್ರಶಸ್ತಿ ಸೇರಿದಂತೆ ಹಲವು ರಾಜ್ಯ ಮಟ್ಟದ ಗೌರವಗಳು ಇವರಿಗೆ ಲಭಿಸಿದ್ದವು. ತಪಸ್ವಿಯಂತೆ ಬದುಕಿದ ಹಿರಿಯ ಚೇತನಕ್ಕೆ ‘ಮಧ್ಯ ಕರ್ನಾಟಕ ಲೈವ್’ ಭಾವಪೂರ್ಣ ಶ್ರದ್ಧಾಂಜಲಿ ಅರ್ಪಿಸುತ್ತದೆ.