ವಿದೇಶಿ ವ್ಯಾಸಂಗ ಬಿಟ್ಟು ಅಜ್ಜನ ಮಾತಿನಂತೆ ಜನರ ಸೇವೆಗೆ ಬಂದ ಸಮರ್ಥ್: ಸಚಿವ ಎಸ್‌ಎಸ್‌ಎಂ ಭಾವುಕ ನುಡಿ

ದಾವಣಗೆರೆ: “ನನ್ನ ಮಗ ಸಮರ್ಥ್ ವಿದೇಶದಲ್ಲಿ ಉನ್ನತ ವ್ಯಾಸಂಗ ಮುಗಿಸಿ ಮತ್ತಷ್ಟು ಓದಬೇಕೆಂಬ ಕನಸು ಕಂಡಿದ್ದ. ಆದರೆ ಅಜ್ಜನ ಒಂದು ಮಾತು ಅವನ ಜೀವನದ ಹಾದಿಯನ್ನೇ ಬದಲಿಸಿತು,” ಎಂದು ಸಚಿವ ಎಸ್.ಎಸ್. ಮಲ್ಲಿಕಾರ್ಜುನ್ ಅವರು ತಮ್ಮ ಪುತ್ರನ ರಾಜಕೀಯ ಪ್ರವೇಶದ ಹಿಂದಿನ ಆಸಕ್ತಿದಾಯಕ ಕಥೆಯನ್ನು ಹಂಚಿಕೊಂಡಿದ್ದಾರೆ.

ದಾವಣಗೆರೆಯಲ್ಲಿ ನಡೆದ ಕಾರ್ಯಕ್ರಮವೊಂದರಲ್ಲಿ ಮಾತನಾಡಿದ ಅವರು, ಸಮರ್ಥ್ ಅವರ ಶೈಕ್ಷಣಿಕ ಸಾಧನೆ ಮತ್ತು ಅವರು ಸಂಸ್ಕಾರಯುತವಾಗಿ ಬೆಳೆದು ಬಂದ ಹಾದಿಯನ್ನು ಜನರ ಮುಂದೆ ತೆರೆದಿಟ್ಟರು.

ಕೊಡೈಕೆನಾಲ್‌ನಿಂದ ಸ್ಕಾಟ್ಲೆಂಡ್‌ವರೆಗೆ ಶಿಕ್ಷಣದ ಪಯಣ

ಸಮರ್ಥ್ ಅವರ ಆರಂಭಿಕ ಶಿಕ್ಷಣ ಕೊಡೈಕೆನಾಲ್ ಇಂಟರ್ನ್ಯಾಷನಲ್ ಸ್ಕೂಲ್‌ನಲ್ಲಿ ನಡೆಯಿತು. ನಂತರ ಉನ್ನತ ವ್ಯಾಸಂಗಕ್ಕಾಗಿ ಯುಕೆಗೆ (UK) ತೆರಳಿದ ಅವರು ಅಲ್ಲಿ ಎಂಬಿಎ (MBA) ಪದವಿಯನ್ನು ಯಶಸ್ವಿಯಾಗಿ ಪೂರೈಸಿದರು. ಕೊರೊನಾ ಸಾಂಕ್ರಾಮಿಕದ ಸಂಕಷ್ಟದ ಸಮಯದಲ್ಲಿ ಅವರನ್ನು ಬಹಳ ಕಷ್ಟಪಟ್ಟು ಭಾರತಕ್ಕೆ ಮರಳಿ ಕರೆತರಲಾಗಿತ್ತು.

Read Also: ದಾವಣಗೆರೆ ದಕ್ಷಿಣ ಉಪಚುನಾವಣೆ: “ಸೇವೆನೇ ನನ್ನ ಸಿದ್ಧಾಂತ” – ಬರಿಗಾಲಿನ ಪ್ರಚಾರದ ರಹಸ್ಯ ಬಿಚ್ಚಿಟ್ಟ ಸಮರ್ಥ್ ಶಾಮನೂರು!

ಆ ಒಂದು ಘಟನೆ ಜೀವನವನ್ನೇ ಬದಲಿಸಿತು!

ಮಗನಿಗೆ ಉನ್ನತ ಶಿಕ್ಷಣದ ಬಗ್ಗೆ ಅಪಾರ ಆಸಕ್ತಿ ಇರುವುದನ್ನು ಕಂಡ ಮಲ್ಲಿಕಾರ್ಜುನ್ ಅವರು, ವಿಶ್ವದ ಅತ್ಯಂತ ಪ್ರತಿಷ್ಠಿತ 5 ವಿಶ್ವವಿದ್ಯಾಲಯಗಳ ಪಟ್ಟಿ ನೀಡಿ ಅಲ್ಲಿ ಸೀಟು ಸಿಕ್ಕರೆ ಮಾತ್ರ ಹೋಗಲು ಸೂಚಿಸಿದ್ದರು. ಅದರಂತೆ ಸಮರ್ಥ್ ಅವರಿಗೆ ಸ್ಕಾಟ್ಲೆಂಡ್‌ನ 11ನೇ ಶತಮಾನದ ಪುರಾತನ ಹಾಗೂ ಪ್ರಸಿದ್ಧ ಸೇಂಟ್ ಆಂಡ್ರ್ಯೂಸ್ ಯೂನಿವರ್ಸಿಟಿಯಲ್ಲಿ (St Andrews University) ಸೀಟು ದೊರೆಯಿತು.

ಆದರೆ, ವಿದೇಶಕ್ಕೆ ಹಾರುವ ಮೊದಲು ಅಜ್ಜ ಶಾಮನೂರು ಶಿವಶಂಕರಪ್ಪ ಅವರ ಆಶೀರ್ವಾದ ಪಡೆಯಲು ಹೋದಾಗ ಪರಿಸ್ಥಿತಿಯೇ ಬದಲಾಯಿತು. “ಎಲ್ಲಿಗೂ ಹೋಗುವುದು ಬೇಡ, ಇಲ್ಲೇ ಇದ್ದು ನಮ್ಮ ಮಿಲ್ಲು, ವ್ಯಾಪಾರ ಮತ್ತು ಜನರ ಕಷ್ಟಗಳನ್ನು ನೋಡು, ಜನರ ಸೇವೆ ಮಾಡುವುದನ್ನು ಕಲಿ,” ಎಂದು ಅಜ್ಜ ನೀಡಿದ ಕರೆಯೇ ಸಮರ್ಥ್ ಅವರನ್ನು ರಾಜಕೀಯದತ್ತ ಸೆಳೆಯಿತು.

ಪರಂಪರೆ ಮತ್ತು ಸಂಸ್ಕಾರದ ಹಾದಿ

ಸಮರ್ಥ್ ಕೇವಲ ಶಿಕ್ಷಣದಲ್ಲಿ ಮಾತ್ರವಲ್ಲದೆ, ಕೌಟುಂಬಿಕ ಪರಂಪರೆ ಮತ್ತು ಧರ್ಮದ ಸಂಸ್ಕಾರದಲ್ಲೂ ಅಷ್ಟೇ ಮುಂದುವರಿದಿದ್ದಾರೆ. ವೀರಶೈವ ಲಿಂಗಾಯತ ಪರಂಪರೆಯಂತೆ ನಿತ್ಯ ಲಿಂಗಪೂಜೆ, ಪಾದಪೂಜೆ ಮತ್ತು ಸ್ವಾಮೀಜಿಗಳ ಬಗ್ಗೆ ಭಕ್ತಿ ಗೌರವಗಳನ್ನು ಹೊಂದಿದ್ದಾರೆ ಎಂದು ತಂದೆ ಹೆಮ್ಮೆಯಿಂದ ಹೇಳಿಕೊಂಡಿದ್ದಾರೆ.

ಜನರ ಬೆಂಬಲಕ್ಕೆ ಮನವಿ

“ಸಮರ್ಥ್ ಎಲ್ಲರನ್ನೂ ಒಗ್ಗೂಡಿಸಿಕೊಂಡು ಹೋಗುವ ಶಕ್ತಿ ಹೊಂದಿದ್ದಾನೆ. ದಾವಣಗೆರೆಯ ಜನತೆ ಮತ್ತು ವೀರಶೈವ ಲಿಂಗಾಯತ ಮಹಾಸಭಾದ ಸದಸ್ಯರು ಅವನಿಗೆ ಸಂಪೂರ್ಣ ಸಹಕಾರ ನೀಡಿ, ಹೆಚ್ಚಿನ ಮತಗಳಿಂದ ಜಯಶೀಲರನ್ನಾಗಿ ಮಾಡಬೇಕು,” ಎಂದು ಮಲ್ಲಿಕಾರ್ಜುನ್ ಈ ಸಂದರ್ಭದಲ್ಲಿ ಮನವಿ ಮಾಡಿದರು.