ತುಂಗಭದ್ರಾ ನದಿಗೆ ಹಾರಿದ ದಾವಣಗೆರೆ ಪ್ರೇಮಿಗಳು: ಸಾವಿನ ದವಡೆಯಿಂದ ರಕ್ಷಿಸಿದ ಹೊನ್ನಾಳಿ ಅಗ್ನಿಶಾಮಕ ದಳ!

ಹೊನ್ನಾಳಿ: ಪ್ರೀತಿ ಎಂಬ ಭ್ರಮೆಯಲ್ಲಿ ಪ್ರಾಣ ಕಳೆದುಕೊಳ್ಳಲು ಮುಂದಾದ ದಾವಣಗೆರೆಯ ಜೋಡಿಯೊಂದನ್ನು ಹೊನ್ನಾಳಿ ಅಗ್ನಿಶಾಮಕ ದಳದ ಸಿಬ್ಬಂದಿ ಸಾಹಸಮಯವಾಗಿ ರಕ್ಷಿಸಿದ್ದಾರೆ. ಕುಟುಂಬದ ವಿರೋಧದ ಹಿನ್ನೆಲೆಯಲ್ಲಿ ಈ ಪ್ರೇಮಿಗಳು ತುಂಗಭದ್ರಾ ನದಿಗೆ ಹಾರಿ ಆತ್ಮಹತ್ಯೆಗೆ ಯತ್ನಿಸಿದ ಘಟನೆ ಮಂಗಳವಾರ ನಡೆದಿದೆ.

ಏನಿದು ಘಟನೆ?: ದಾವಣಗೆರೆ ಮೂಲದ ಸಮೀರ್ ಹಾಗೂ ಸಿಂಚನಾ ಎಂಬುವವರು ಪರಸ್ಪರ ಪ್ರೀತಿಸುತ್ತಿದ್ದರು. ಆದರೆ ಇವರ ಸಂಬಂಧಕ್ಕೆ ಮನೆಯವರಿಂದ ತೀವ್ರ ವಿರೋಧ ವ್ಯಕ್ತವಾಗಿತ್ತು ಎನ್ನಲಾಗಿದೆ. ಇದರಿಂದ ಹತಾಶೆಗೊಂಡ ಜೋಡಿ, ಹೊನ್ನಾಳಿ ಪಟ್ಟಣದ ತುಂಗಭದ್ರಾ ನದಿ ಸೇತುವೆ ಬಳಿ ಬಂದು ಏಕಾಏಕಿ ನದಿಗೆ ಜಿಗಿದಿದ್ದಾರೆ.

ನದಿಗೆ ಜಿಗಿದ ಪ್ರೇಮಿಗಳು ನೀರಿನ ಸೆಳೆತಕ್ಕೆ ಸಿಲುಕಿ ಕೊಚ್ಚಿ ಹೋಗುತ್ತಿರುವುದನ್ನು ಗಮನಿಸಿದ ಸ್ಥಳೀಯರು ತಕ್ಷಣ ಅಗ್ನಿಶಾಮಕ ದಳಕ್ಕೆ ಮಾಹಿತಿ ನೀಡಿದ್ದಾರೆ.

Read Also: ದಾವಣಗೆರೆ: ಕರ್ತವ್ಯದ ಒತ್ತಡದ ನಡುವೆ ‘ಪೊಲೀಸ್ ಹೋಳಿ’ ಸಂಭ್ರಮ; ಕುಟುಂಬದೊಂದಿಗೆ ಬಣ್ಣ ಹಚ್ಚಿ ನಲಿದ ಪೊಲೀಸರು

ಯಶಸ್ವಿ ಕಾರ್ಯಾಚರಣೆ:

ಮಾಹಿತಿ ಸಿಕ್ಕ ಕೂಡಲೇ ಸ್ಥಳಕ್ಕೆ ಧಾವಿಸಿದ ಹೊನ್ನಾಳಿ ಅಗ್ನಿಶಾಮಕ ಠಾಣಾಧಿಕಾರಿ ಟಿ. ಆರ್. ಪರಶುರಾಮ್ ನೇತೃತ್ವದ ತಂಡ, ನದಿಗೆ ಇಳಿದು ಕಾರ್ಯಾಚರಣೆ ಕೈಗೊಂಡಿತು. ಅಗ್ನಿಶಾಮಕ ಸಿಬ್ಬಂದಿಯ ಸಮಯೋಚಿತ ರಕ್ಷಣೆಯಿಂದಾಗಿ ಇಬ್ಬರನ್ನೂ ಸುರಕ್ಷಿತವಾಗಿ ದಡಕ್ಕೆ ತರಲಾಗಿದೆ. ಅದೃಷ್ಟವಶಾತ್ ನದಿಯಲ್ಲಿ ನೀರಿನ ಹರಿವು ಕಡಿಮೆ ಇದ್ದಿದ್ದರಿಂದ ಪ್ರಾಣಾಪಾಯ ತಪ್ಪಿದೆ. ರಕ್ಷಿಸಲ್ಪಟ್ಟ ಪ್ರೇಮಿಗಳನ್ನು ಕೂಡಲೇ ಸ್ಥಳೀಯ ಆಸ್ಪತ್ರೆಗೆ ದಾಖಲಿಸಿ ಬಳಿಕ ಇಬ್ಬರನ್ನೂ ಪೊಲೀಸರಿಗೆ ಒಪ್ಪಿಸಲಾಗಿದೆ.